၂၀၁၀ တုန်းက ကျနော် ဖာဂူဆန်ဖိတ်လို့ သူနဲ့အတူ နေ့လည်စာစားခဲ့ပါတယ်၊ သူက အဲဒီမှာ ကျနော့်ကို ပေါ့ဂ်ဘာအကြောင်းပြောပြတယ်၊ အဲဒီတုန်းက ပေါ့ဂ်ဘာက ၁၇ နှစ်ပဲ ရှိဦးမယ်၊ ဖာဂူဆန်ပြောခဲ့တာက "ဒီကောင်လေးကို မင်းမြင်လား၊ သူက ထူးခြားတဲ့ကစားသမား၊ အရည်အသွေးလည်းအပြည့်ရှိတယ်၊ ထိပ်တန်းအဆင့်ကိုရောက်လာမှာ၊ ဒါပေမယ့် သူက အိပ်မက်မက်နေတဲ့သူတဦးပဲ၊ တကယ်လို့ သူ့လမ်းကို ပြသပေးဖို့ ဘယ်သူမှမရှိဘူးဆိုရင်တော့ ဘယ်တော့မှ အောင်မြင်မှာမဟုတ်ဘူး" တဲ့။
လိုင်ယွန်ကစားသမားဟောင်း ပါစ်ကယ်အိုလ်မီတာက ပြန်ပြောပြခဲ့တာပါ။ တကယ်လည်း ဖာဂူဆန်ရဲ့ စကားက သွေးထွက်အောင်မှန်ခဲ့ပါတယ်။ ပေါ့ဂ်ဘာက ယူနိုက်တက်အသင်းကြီးမှာ နေရာရချင်စိတ်တွေများနေပေမယ့် အသင်းကွင်းလယ်ပိုင်းမှာ ပေါလ်စခိုးတို့လို ကစားသမားတွေရှိနေလို့ နေရာမရခဲ့ပါဘူး။ ဒီအတွက် သူက ဂျူဗီကို ပြောင်းသွားခဲ့ပါတယ်။ ဂျူဗီမှာတော့ ပီယာလိုနဲ့ တွဲဖက်ပြီး သူ အောင်မြင်ခဲ့ပါတယ်။ ဒါပေမယ့် ဖာဂူဆန်ပြောခဲ့သလိုပါပဲ၊ အဲဒီမှာ သူ့ကို နည်းပေးလမ်းပြလုပ်ပေးခဲ့တဲ့ ကစားသမားတွေက အများကြီးပါ။
ဘတ်ဖွန်လိုကစားသမားကအစ ယူနိုက်တက်က ဒီကောင်လေးကို ဘာလို့ ဖရီးပေးလိုက်တာလဲဆိုပြီးတော့တောင် ပြောဖူးပါတယ်။ ဒီလိုမျိုး ကစားသမားတွေ ဝန်းရံပေးနေခဲ့တာပါ။ ယူနိုက်တက်က သူ့ကို ပေါင် ၈၉ သန်းပေးပြီးတော့ ပြန်ခေါ်ခဲ့ပေမယ့် ဂျူဗီမှာ ပြသခဲ့တဲ့ ခြေစွမ်းမျိုးကို သူမရတော့ပါဘူး။ သူ့ခြေ၊ သူ့လက်နဲ့ သူ ဦးဆောင်ပြီးလုပ်ဆိုရင် ပေါ့ဂ်ဘာက မလုပ်တတ်မကိုင်တတ်တော့ပါဘူး။ ခြေစွမ်းက တကယ်ကောင်းတယ်။ Killer Pass တွေ က ကျွတ်ဆင်ကြီးတွေ။ ဒါပေမယ့် သူ့ရဲ့ အသင်းအပေါ်ထားတဲ့ စိတ်ဓာတ်၊ အမူအကျင့်၊ သူနဲ့လက်တွဲနေတဲ့ အေးဂျင့် (ရွိုင်အိုလာ)ရဲ့ အကျင့်စရိုက်တွေနဲ့အတူ ပေါ့ဂ်ဘာက ယူနိုက်တက်မှာ ဘာမှဖြစ်မလာခဲ့တော့ပါဘူး။
ရွိုင်အိုလာကြောင့်ချည်းပဲလို့ မဆိုလိုပါဘူး။ ကစားသမားရဲ့ ပင်ကိုယ်စိတ်ဓာတ်နဲ့ အမူအကျင့်က ပိုပြီးတော့ သက်ရောက်နေခဲ့တာပါ။ ပေါ့ဂ်ဘာက ဆင်ကန်းတကောင်လိုပါပဲ။ သူ့ကို ကြိုးဆွဲပြီးတော့ ခေါ်မယ်ဆိုရင် ဖြောင့်နေအောင်ကို သူ လိုက်တတ်ပါတယ်။ အဲလိုမှမဟုတ်ရင်တော့ ဆင်ကန်းတောတိုးသလိုဖြစ်တော့တာပါပဲ။ အဲလိုဖြစ်လာတိုင်းလည်း သူ့ကိုယ်သူ မထိန်းနိုင်ပါဘူး။ ပါးစပ်ကနေ လျှောက်ပြောမယ်၊ ကွင်းထဲမှာ ထင်တာတွေလုပ်မယ်။ ဒီလိုကစားသမားမျိုးကို ပိုင်ဆိုင်ဖို့က စားရမှာလည်းသဲတရှပ်ရှပ်၊ ပစ်ရမှာလည်း ဆီတဝင်းဝင်းဆိုသလိုပါပဲ။ ထိန်းရသိမ်းရတာ ခက်ပါတယ်။ လက်ရှိပုံစံအတိုင်းဆိုရင် စုစည်းမှုအားကောင်းတဲ့ အသင်းကြီးတွေက ပေါ့ဂ်ဘာကို ခေါ်ပြီး သူတို့အစုအစည်းကို အပျက်ခံမယ်မထင်တော့ပါဘူး။
သူ့အတွက် ဦးဆောင်ပေးမယ့် ကစားသမားတဦးလောက်တော့ အနည်းဆုံးရှိမှ ပေါ့ဂ်ဘာက အဆင်ပြေတယ်ဆိုတဲ့ ပုံစံမျိုးဖြစ်နေပါတယ်။ သူ တဦးတည်းနဲ့ ရပ်တည်နိုင်ဖို့တော့ အရမ်းခက်ပါတယ်။ အခုတော့ သူ ဘယ်လိုဖြစ်သွားလဲဆိုတာ အားလုံးလည်း သိပြီးသားပါ။ နှမျောစရာကောင်းခဲ့ပေမယ့် ပေါ့ဂ်ဘာဟာ သူ့ကိုယ်သူပဲ ဖျက်ဆီးခဲ့တာပါ။
Comments
Post a Comment