ဒဏ်ရာက ပြန်လာပြီးတဲ့နောက် အခုလောက်အထိ ခြေစွမ်းပြကစားနိုင်တာကို ဒီဘရိုင်းနား ကိုယ်တိုင်တောင် မယုံနိုင်အောင်ဖြစ်နေတာပါ။
မန်စီးတီး နာမည်ကျော်ကွင်းလယ်လူ ဒီဘရိုင်းနားက တံကောက်ကြောဒဏ်ရာက ပြန်လာပြီးနောက်ပိုင်း သူ့ရဲ့ခြေစွမ်းကို သူကိုယ်တိုင်တောင် မယုံနိုင်လောက်အောင်ဖြစ်ရတယ်လို့ ဝန်ခံပြောဆိုခဲ့ပါတယ်။ လူတန်ကို ၆-၂ ဂိုးနဲ့အနိုင်ရတဲ့ FA ဖလားပွဲမှာ ဒီဘရိုင်းနားက ဂိုးဖန်တီးမှု ၄ ကြိမ်အထိပြုလုပ်ခဲ့ပြီး ဟာလန်းကလည်း တစ်ယောက်တည်း ၅ ဂိုးသွင်းနိုင်ခဲ့တာကြောင့် သူတို့နှစ်ဦးရဲ့စွမ်းဆောင်ရည်က မန်ချက်စတာဒါဘီပွဲမတိုင်ခင် အဲရစ်တန်ဟက်နဲ့ မန်ချက်စတာယူနိုက်တက်အသင်းတို့ကို သတိပေးခေါင်းလောင်းသံ ပေးလိုက်တာလည်းဖြစ်ပါတယ်။
ဒီဘရိုင်းနားဟာ ဒီရာသီ ပရီးမီးယားလိဂ်အဖွင့်ပွဲဖြစ်တဲ့ ဘန်လေနဲ့ပွဲမှာ တံကောက်ကြောဒဏ်ရာရရှိခဲ့ပြီး ၆ လအထိ အနားယူခဲ့ပေမဲ့ ဘောလုံးပြန်ကစားနိုင်ချိန်မှာ မယုံနိုင်လောက်အောင် ခြေစွမ်းပြနေသလို ဂိုးဖန်တီးမှု ၁၂ ကြိမ်အထိ ပြုလုပ်နိုင်ခဲ့ပါတယ်။ လူတန်နဲ့ပွဲအပြီး အင်တာဗျူးမှာ ဒီဘရိုင်းနားက "တံကောက်ကြောဒဏ်ရာနဲ့ပတ်သက်လို့ ကျွန်တော် စိုးရိမ်စိတ် မဖြစ်ခဲ့ပေမဲ့ ဒဏ်ရာက ပြန်လာပြီးချိန်မှာ ဒီလောက်အထိ ခြေစွမ်းပြနိုင်မယ်လို့ မထင်မိခဲ့ပါဘူး။ ဒါက ကျွန်တော် အမှန်အတိုင်း ဝန်ခံတာပါ"လို့ ပြောကြားခဲ့ပါတယ်။
တနင်္ဂနွေကျရင်ကစားမဲ့ မန်ချက်စတာဒါဘီပွဲနဲ့ပတ်သက်ပြီး ဒီဘရိုင်းနားက "အခုလောလောဆယ် ကျွန်တော်တို့အသင်းရဲ့အနေအထားက ကျေနပ်စရာကောင်းပြီး ပွဲအများစုကို အနိုင်ရခဲ့ပါတယ်။ ပြိုင်ဘက်တိုင်းက တစ်ခုမဟုတ်တစ်ခု ဒုက္ခပေးနိုင်စွမ်းရှိတာကြောင့် ပွဲတိုင်းဟာ ခက်ခဲပါတယ်။ ယူနိုက်တက်ရဲ့လက်ရှိအနေအထားက ဘယ်လိုပဲဖြစ်နေပါစေ မန်ချက်စတာဒါဘီဆိုတဲ့အရှိန်အဝါက မပျောက်ဆုံးသွားဘဲ တစ်ခါတလေကျရင် ယူနိုက်တက်အသင်းက ရုန်းကန်နေရချိန်မှာ ခြေစွမ်းကောင်းပြသနိုင်တာကို ကျွန်တော် သိထားပြီးဖြစ်ပါတယ်။ တနင်္ဂနွေနေ့ပွဲကျရင် ကျွန်တော်တို့ ပုံစံကောင်းပြသနိုင်အောင် ကြိုးစားသွားမှာပါ"လို့ ပြောကြားခဲ့ပါတယ်။
Comments
Post a Comment