ဘာလော့တယ်လီဆိုတာ...

 

ကစားသမားဘ၀မှာ လူရွှင်တော်တဦး၊ တလွဲတွေလုပ်လေ့ရှိသူလို့ ကျော်ကြားခဲ့တဲ့ မာရီယိုဘာလော့တယ်လီရဲ့ နောက်ကွယ်မှာ လှပတဲ့အကြောင်းရင်းရာတွေလည်း အများကြီးရှိပါတယ်။ အာဖရိကသားတွေအတွက် ရည်ရွယ်ပြီးတော့ အာဖရိကမှာပဲ သူတို့တွေချည်းပဲကစားဖို့အတွက် အကြံပြုခဲ့သူပါ။ လူမည်းတွေကို ခွဲခြားဆက်ဆံမှုတွေ၊ နှိမ်မှုတွေအောက်ကနေ ရုန်းထွက်ဖို့အတွက် ဘာလော့တယ်လီက အသံစထွက်ခဲ့တဲ့ ကစားသမားတွေထဲမှာပါပါတယ်။

အမွန်မြတ်ဆုံးလုပ်ရပ်ကတော့ သူ့ရဲ့လစာငွေထဲက ထက်ဝက်ကို အာဖရိကက မသန်စွမ်းကလေးငယ်တွေအတွက် ဘာလော့တယ်လီက ကူညီထောက်ပံ့ပေးနေတယ်ဆိုတာပါပဲ။ ဟုတ်ပါတယ်။ ငွေကြေးတချို့တောင်မှမဟုတ်ပါဘူး။ သူရနေတဲ့ လစာငွေရဲ့ တဝက်တိတိကို အမြဲတမ်းခွဲဝေပြီးတော့ ထောက်ပံ့ပေးနေခဲ့တာပါ။

"ကျနော်က အီတလီနိုင်ငံသားဆိုပေမယ့် ကျနော့်ရဲ့တကယ့်နိုင်ငံသားက ဂါနာပါ၊ မိဘတွေရဲ့ စွန့်ပစ်တာကို ကျနော်ခံခဲ့ရပြီးတော့ နတ်သမီးလေးနှစ်ပါးက ကျနော့်ကိုမွေးစားခဲ့လို့ပါ၊ နေ့တိုင်းလူမျိုးရေးခွဲခြားမှုဒဏ်ကို ခံနေခဲ့၇တယ်၊ အီတလီဂျာစီကို ဝတ်ဆင်ခွင့်ရတဲ့ ပထမဆုံးလူမည်းက ကျနော်ပဲ၊ ကျနော်စိတ်မဆိုးပါဘူး၊ ဒါပေမယ့် ကျနော့်ရဲ့ ဘ၀အတွေ့အကြုံတွေက လူတချို့အပေါ်တော့ ဆက်ဆံပုံကွာစေခဲ့တယ်၊ ဒီတော့ ကျနော့်ကို မဝေဖန်ခင် ကျနော့်ဘ၀အကြောင်းကို စူးစမ်းလေ့လာကြည့်ပါ" လို့ ဘာလော့တယ်လီက ပြောဖူးပါတယ်။

ဘာလော့တယ်လီ လူဆိုးတယောက်လိုဖြစ်လာတဲ့အကြောင်းရင်းကို ကြည့်မယ်ဆိုရင် ပတ်ဝန်းကျင်ကြောင့်ပါပဲ။ ဝေဖန်သူတွေ၊ တိုက်ခိုက်သူတွေ၊ လူမည်းဆိုပြီးနှိမ့်ချ၊ခွဲခြားခံခဲ့ရတာတွေက သူ့အတွက်စိတ်ဒဏ်ရာပါပဲ။ မန်စီးတီးကစားသမားဘ၀မှာ သူ့ကိုလာတွေ့တဲ့ ကလေးငယ်တဦးကို ကျောင်းမတက်ဘူးလားလို့မေးခဲ့တော့ အနိုင်ကျင့်ခံနေရလို့ မသွားတော့ဘူးလို့ ပြန်ပြောခဲ့ဖူးပါတယ်။ ဒီအချိန်မှာ သူ့ကားနဲ့ ကလေးကိုတင်ခေါ်ပြီး ကျောင်းအထိ ဘာလော့တယ်လီက လိုက်သွားပြီး ကျောင်းအုပ်ကြီးကိုပါတွေ့၊ အနိုင်ကျင့်တဲ့ ကလေးတွေကိုပါ တွေ့ပြီး နောက်ဒီလိုတွေမလုပ်ဖို့ ပြောပေးခဲ့တာက ဘာလော့တယ်လီပါ။

သူ့ရဲ့နဂိုမူရင်းစိတ်အခံက ဖြူစင်တယ်ဆိုတာကို အဲဒီကိစ္စမှာတွေ့နိုင်ပါတယ်။ ဒါပေမယ့် ဖိအားတွေ၊ လှောင်ပြောင်မှုတွေကိုချည်းပဲ တွေ့လာရချိန်မှာတော့ လူသားတဦးပဲဖြစ်တဲ့ ဘာလော့တယ်လီက စိတ်ထွက်ပေါက်ရှာပါတော့တယ်။ နည်းလမ်းမမှန်ကန်လို့ ဟားစရာ၊ လှောင်စရာတွေဖြစ်ခဲ့ရပေမယ့် သူ ဒီလိုဖြစ်ခဲ့တာ ဘာကြောင့်လဲဆိုတဲ့အကြောင်းရင်းကို ဘယ်သူကမှ မရှာဖွေခဲ့ကြပါဘူး။ သူ့ရဲ့ ဘောလုံးကွင်းပြင်ပက လုပ်ရပ်တွေကိုကြည့်မယ်ဆိုရင် ဒီကစားသမားက ဘယ်လောက်ထိ မွန်မြတ်တဲ့စိတ်ထားရှိလဲဆိုတာ သိပါလိမ့်မယ်။

အီတူးက ပြောဖူးပါတယ်။ လေ့ကျင့်ကွင်းမှာ သူတွေ့ရတဲ့ ဘာလော့တယ်လီရဲ့ ပုံစံအစစ်ကို တကယ့်ကွင်းအထက်မှာ သူ ဘယ်တုန်းကမှ မမြင်ခဲ့ရပါဘူးတဲ့။ လေ့ကျင့်ကွင်းက တဝက်လောက်သာ သူကစားရင်တောင် ထိပ်တန်းအဆင့်မှာ အချိန်အကြာကြီးရှိနေမှာလို့ ပြောခဲ့တာပါ။ တကယ့်ကွင်းထဲမှာ ပရိသတ်တွေအများကြီးပါ။ သူ့ကို ငှက်ပျောသီးနဲ့ပေါက်မယ့်သူ၊ မျောက်လို့အော်မယ့်သူတွေရှေ့မှာ ဘာလော့တယ်လီ ဘာလုပ်ခဲ့ပါသလဲ။ သူ ပေါက်ကရတွေပဲ လုပ်ပြနေခဲ့တာပါ။ ဘာလော့တယ်လီအစစ်ကို ကျနော်တို့ကွင်းထဲမှာ ဘယ်တော့မှမတွေ့ခဲ့ရပါဘူး။ ကွင်းပြင်ပမှာသာ တွေ့ရပါလိမ့်မယ်။ ဒီတော့ ဘာလော့တယ်လီက ဘောလုံးလူဆိုးအဖြစ် သမုတ်ခံခဲ့ရပါတယ်။ ဒါပေမယ့် သူ့က မွန်မြတ်တဲ့ ဘောလုံးလူဆိုးတဦးပါ။