#ဖာဂူဆန် ဟာ စိန့်မာရင်အသင်းမှာ ပြုပြင်ပြောင်းလဲမှုတွေ ဆက်တိုက်လုပ်ခဲ့တယ်။ လူငယ်တွေကို ရဲရဲတင်းတင်းနေရာပေးခဲ့တယ်။ ၁၉၇၄ သူစတင်ကိုင်တွယ်ချိန်မှာ စိန့်မာရင်ဟာ ဒုတိယတန်း အမှတ်ပေးဇယားအောက်ခြေမှာပဲ ရှိနေတာပါ။ ဒါပေမယ့် ၃နှစ်အကြာ ၁၉၇၇မှာတော့ စကော့ပထမတန်းချန်ပီယံဖြစ်လာပါတယ်။ အမှတ်ပေးချန်ပီယံဖြစ်ချိန် စိန့်မာရင်အသင်းသားတွေရဲ့ ပျမ်းမျှအသက်က ၁၉နှစ်ဖြစ်ပြီး အသင်းခေါင်းဆောင်ဖစ်ဇ်ပက်ထရစ်က အသက်၂၀ပဲရှိပါသေးတယ်…
စိန့်မာရင်ကို ငယ်ရွယ်တဲ့လူစာရင်းတစ်ခုနဲ့ အမှတ်ပေးချန်ပီယံဖြစ်အောင် ဦးဆောင်နိုင်ခဲ့တဲ့ #ဖာဂူဆန် ကို ၁၉၇၇ခုနှစ်မှာပဲ အဘာဒင်းအသင်းက ချဉ်းကပ်လာခဲ့တယ်။ ဖာဂူဆန်က ဒါကိုငြင်းဆန်ပယ်ချခဲ့တယ်။ နောက်တစ်နှစ်မှာလည်း အဘာဒင်းက သူ့ကိုထပ်မံကမ်းလှမ်းခဲ့ပြီး နှစ်ဖက်သဘောတူညီမှုမရသေးမီမှာပဲ စိန့်မာရင်အသင်းက ဒါကိုသိရှိသွားခဲ့တယ်။ စာချုပ်ပါအချက်အလက်တွေကို ချိုးဖောက်တယ်ဆိုပြီး ဖာဂူဆန်ကို ထုတ်ပယ်လိုက်ပါတယ်…
အဲ့ဒီနောက်မှာတော့ ဖာဂူဆန်ဟာ အဘာဒင်းနည်းပြဖြစ်လာခဲ့တယ်။ အဘာဒင်းဆိုတာ စကော့တလန်ရဲ့ အင်အားကြီးကလပ်အသင်းတစ်သင်းလို့ ပြောရမှာဖြစ်ပေမယ့် သမိုင်းတလျှောက်မှာ စကော့တလန် အမှတ်ပေးဖလားကို တစ်ကြိမ်ပဲ ရဖူးပါတယ်။ #ဖာဂူဆန် ရောက်ရောက်ချင်းနှစ်မှာတော့ သူတို့ အဆင့်၄ပဲရခဲ့တယ်။ နောက်တစ်နှစ်မှာလည်း မတ်လလောက်ထိ အဘာဒင်းက အမှတ်ပေးဇယားရဲ့ အဆင့်၆နေရာမှာပဲ ရှိနေခဲ့တယ်။ ဒါပေမယ့် ၁၅ပွဲဆက်တိုက် ရှူံးပွဲမရှိကစားပြီး အမှတ်ပေးချန်ပီယံ ဖြစ်နိုင်ခဲ့ပါတယ်…
အဲ့ဒီနောက်မှာတော့ အဘာဒင်းနဲ့ ဖာဂူဆန်ရဲ့ အောင်မြင်မှုတွေက ဆက်တိုက်ပါပဲ။ ၁၉၈၂မှာ စကော့တလန် ရှူံးထွက်ဖလား ချန်ပီယံဖြစ်ခဲ့တယ်။ နောက်တစ်နှစ်အကြာမှာ ဥရောရှူံးထွက်ဗိုလ်များဖလား Cup winners’ Cupမှာ ချန်ပီယံဖြစ်ခဲ့ပြန်တယ်။ ဂန္တဝင်ကြီး ဒီစတီဖာနိုရဲ့ ရီးယဲလ်မက်ဒရစ်ကို အနိုင်ကစားခဲ့တာဖြစ်ပါတယ်…
ဥရောပဖလားတစ်လုံးရပြီး ဆယ်ရက်လောက်အကြာမှာပဲ စကော့ရှူံးထွက်ဖလား ဗိုလ်လုပွဲမှာ အဘာဒင်းက ရိန်းဂျားစ်ကို နိုင်ပြီး ချန်ပီယံဖြစ်ခဲ့ပြန်တယ်။ ဒါပေမယ့် ဒီပွဲမှာ အသင်းသားတွေရဲ့ စွမ်းဆောင်ရည်က ညံ့ဖျင်းခဲ့တယ်လို့ ဖာဂူဆန်ကထောက်ပြခဲ့ပြီး ကစားသမားတွေကို ပုံမှန်နားရက်မပေးဘဲ အပိုထရိန်နင်ဆင်းစေခဲ့ပါတယ်…
နောက်တစ်နှစ်မှာတော့ အဘာဒင်းဟာ ဟမ်းဘတ်ကို အနိုင်ရပြီး ဥရောပစူပါဖလားချန်ပီယံဖြစ်ခဲ့တယ်။ စကော့ရှူံးထွက်ဖလားကိုလည်း ထပ်ရခဲ့သလို အမှတ်ပေးပြိုင်ပွဲမှာလည်း ၇မှတ်အသာနဲ့ ချန်ပီယံဖြစ်နိုင်ခဲ့တယ်။ နောက်တစ်နှစ်မှာလည်း ၇မှတ်အသာနဲ့ပဲ အမှတ်ပေးဖလား ထပ်ရခဲ့ပါတယ်…
အသင်းသမိုင်းတလျှောက် စကော့တလန်ပြည်တွင်းလိဂ်မှာ တစ်ခါပဲ ချန်ပီယံဖြစ်ဖူးတဲ့ အဘာဒင်းဟာ #ဖာဂူဆန် လက်ထက်၇နှစ်အတွင်းမှာ ၃ကြိမ်တိတိ ချန်ပီယံဖြစ်ခဲ့တာပါပဲ…
နောက်တစ်နှစ်မှာတော့ အဘာဒင်းဟာ ပြည်တွင်းရှူံးထွက်ဖလား ၂လုံးစလုံး ဆွတ်ခူးနိုင်ခဲ့ပေမယ့် အမှတ်ပေးပြိုင်ပွဲမှာတော့ အဆင့်၄နေရာ ရောက်သွားပါတယ်။ ဖာဂူဆန်လည်း မိတ်ဆွေဂျော့စတိန်းရဲ့ လက်ထောက်နည်းပြအဖြစ် စကော့တလန်လက်ရွေးစင်အသင်းကို ပူးတွဲကိုင်ခဲ့ရတယ်။ ကမ္ဘာ့ဖလားခြေစစ်ပွဲကာလမှာ ဂျော့စတိန်းဝမ်းနည်းဖွယ် ရုတ်တရက်ကွယ်လွန်သွားတဲ့အခါ play-offsအဆင့်ကို ယာယီနည်းပြအဖြစ် ဖာဂူဆန်ဆက်လက်တာဝန်ယူခဲ့ရပြီး စကော့တလန်ကို ကမ္ဘာ့ဖလားဆီ အရောက်ပို့ပေးနိုင်ခဲ့ပါတယ်…
ကမ္ဘာ့ဖလားအပြီးမှာတော့ စကော့တလန်ဘောလုံးအဖွဲ့ချုပ်ကလည်း ဖာဂူဆန်ကို အမြဲတမ်းနည်းပြအဖြစ် ခန့်အပ်ဖို့ သိပ်ဆန္ဒမရှိခဲ့သလို ဖာဂူဆန်ကလည်း ဒီရာထူးကို အမြဲတာဝန်ယူဖို့ စိတ်အားမထက်သန်ခဲ့ဘူး။ ဒါကြောင့် လက်ရွေးစင်နည်းပြအဖြစ် တခြားတစ်ယောက်က တာဝန်ယူသွားခဲ့တယ်…
ဖာဂူဆန်ကတော့ အဘာဒင်းနည်းပြချုပ်အနေနဲ့ ဆက်ရှိနေခဲ့တယ်။ သူစိတ်အားထက်သန်နေတာက အင်္ဂလန်ကို ပြောင်းဖို့ပါပဲ။ ၁၉၈၀ပြည့်လွန်နှစ်တွေကတည်းက အင်္ဂလန်ကလပ်အသင်းတွေက သူ့ကိုကမ်းလှမ်းမှုတွေ ရှိခဲ့ပါတယ်။ အစောပိုင်းမှာတော့ ရှက်ဖီးနဲ့ဝုဗ်တို့လို တန်းဆင်းသွားရတဲ့၊ တန်းဆင်းလုဆဲဆဲဖြစ်နေတဲ့ အသင်းတွေပေါ့။ ၁၉၈၃မှာ စကော့ထိပ်သီးကလပ် ရိန်းဂျားစ်က ကမ်းလှမ်းခဲ့ပေမယ့် ဖာဂူဆန်ကတော့ ကစားသမားဘဝက သူ့ကို ဆိုးဆိုးရွားရွားဆက်ဆံထားတဲ့ ကလပ်အသင်းဆီ ပြန်သွားဖို့ စိတ်မကူးခဲ့ပါ။ အဲ့ဒီကာလတွေမှာပဲ အက်စ်တွန်ဗီလာကလည်း ကမ်းလှမ်းခဲ့ပေမယ့် ညှိနှိုင်းမှုတွေ အဆင်မပြေခဲ့ဘူး…
အဲ့ဒီနောက် စပါးနဲ့ သဘောတူညီမှုရဖို့ အတော်နီးစပ်ခဲ့ပေမယ့် စပါးဖက်က ဖာဂူဆန်လိုချင်တဲ့ ၅နှစ်စာချုပ်မပေးဘဲ စာချုပ်သက်တမ်းကို ၃နှစ်ပဲထားခဲ့တာကြောင့် ဆွေးနွေးမှုတွေ ပျက်ပြယ်သွားပြန်ပါတယ်…
၁၉၈၆မှာတော့ ဖာဂူဆန်ကို အာဆင်နယ်ကပါ စိတ်ဝင်စားခဲ့ပေမယ့် ကမ္ဘာ့ဖလားအပြီးထိ မစောင့်ချင်၊ မစောင့်နိုင်ခဲ့တာကြောင့် အဆင်မပြေဖြစ်နေပြန်တယ်။ ဘာစီလိုနာကလည်း နည်းပြတယ်ရီဗာနေဘယ်လ် ထွက်ဖို့ရှိနေလို့ ဖာဂူဆန်ကို အင်တာဗျူးလုပ်ခဲ့ပါသေးတယ်။ ဒါပေမယ့် နောက်ဆုံးဗာနေဘယ်လ်က အသင်းမှာ ဆက်နေဖို့ ဆုံးဖြတ်လိုက်တာကြောင့် ဆွေးနွေးမှုတွေ ရပ်တန့်သွားရပါတယ်…
၁၉၈၆ကမ္ဘာ့ဖလားကာလမှာကတည်းက ယူနိုက်တက်ဂန္တဝင်ဆာဘော်ဘီချာလ်တန်က ဖာဂူဆန်ကို စတင်စောင့်ကြည့်နေခဲ့ပြီဖြစ်ကြောင်း သိရပါတယ်။ ဒါပေမယ့် ဘုတ်အဖွဲ့က နည်းပြရွန်အက်ကင်ဆန်ကို အတတ်နိုင်ဆုံး အချိန်ပေးခဲ့တယ်။ အဲ့ဒီနှစ် နိုဝင်ဘာလ၊ လိဂ်ဖလား တတိယအဆင့်မှာ ဆောက်သမ်တန်ကို ဂိုးပြတ်ရှူံးတော့မှသာ ဒီလောက်ဆိုတော်လောက်ပြီလို့ ဆုံးဖြတ်ခဲ့တာဖြစ်ပါတယ်…
ဒီလိုနဲ့ ယူနိုက်တက်က ရွန်အက်ကင်ဆန်ကို ထုတ်ပယ်လိုက်တယ်။ တစ်နေ့ထဲမှာပဲ ဖာဂူဆန်ကို နည်းပြသစ်အဖြစ် ခန့်အပ်ကြောင်း ကြေညာခဲ့တယ်။ ဒီဆုံးဖြတ်ချက်နဲ့ပတ်သက်လို့ မာတင်အက်ဒ်ဝပ်က အခုလို ရှင်းချက်ထုတ်ခဲ့ပါတယ်…
“ကျနော်တို့တွေ အမှတ်ပေးဖလားမရတာ ၁၉နှစ်ရှိသွားပါပြီ။ ရွန်အက်ကင်ဆန်လက်ထက် ၅နှစ်တာကာလမှာ ကျနော်တို့ ထိပ်ဆုံး၄သင်း ပြင်ပကို ဘယ်တော့မှမရောက်ခဲ့ဘူး။ ဒါပေမယ့် ချန်ပီယံဆုကို စိန်ခေါ်နိုင်တာတော့ တစ်ရာသီပဲရှိခဲ့ပါတယ်။ အမှတ်ပေးချန်ပီယံဖြစ်ဖို့ဆိုတာ ကျနော်တို့ရဲ့ ရည်မှန်းချက်ပါ။ လက်ရှိမှာတော့ လီဗာပူးက အင်္ဂလန်ကို လွှမ်းမိုးထားတဲ့ အသင်းဖြစ်နေတယ်။ ဒါကြောင့် ပထမအဆင့် သူတို့နဲ့ ပခုံးချင်းယှဉ်ရပ်နိုင်အောင်၊ အမီလိုက်နိုင်အောင် အရင်ဆုံး ကြိုးစားရပါမယ်”
အဲ့ဒီအချိန် လီဗာပူးက ဘယ်လောက်ကောင်းနေသလဲဆိုတာ နည်းပြသစ်ဖာဂူဆန်ကိုယ်တိုင်လည်း ကောင်းကောင်းသိထားပြီးသားပါပဲ။ ၁၉၈၀ ဥရောပဖလားတုန်းက ဖာဂူဆန်ရဲ့ အဘာဒင်းဟာ အန်ဖီးလ်မှာ လီဗာပူးကို လေးဂိုးပြတ်ရှူံးခဲ့ဖူးတယ်…
“သူတို့ကို ထိပ်ဆုံးကနေ ဆွဲချနိုင်ဖို့ဆိုတာ ကျနော့်အတွက် အကြီးမားဆုံး စိန်ခေါ်မှုပဲ”လို့ ဖာဂူဆန်ကဆိုပါတယ်…
ဒါပေမယ့် ဖာဂူဆန်လက်ထက် ပထမဆုံးပွဲမှာတော့ ယူနိုက်တက်ဟာ အောက်စ်ဖို့ဒ်ကို 2-0နဲ့ သွားရှူံးခဲ့တယ်။ နောက်တစ်ပွဲမှာ နော်ဝစ်ချ်နဲ့ ဂိုးမရှိသရေကျပြီး အမှတ်ပေးဇယားရဲ့အောက်ဆုံးအပေါ်တစ်ဆင့်ထိ ထိုးကျသွားခဲ့တယ်။ ကြံ့ခိုင်မှုပိုင်းအားနည်းတာက အဓိကပြဿနာဖြစ်ခဲ့ပြီး နောက်ပိုင်းပွဲစဉ်တွေမှာလည်း လူတန်တောင်းနဲ့ ဝင်ဘယ်လ်ဒန်တို့ကို ထပ်ရှူံးခဲ့ပေမယ့် လီဗာပူးကို နှစ်ကျော့စလုံး အနိုင်ကစားခဲ့တယ်။ ရာသီကုန်ချိန်မှာ အဆင့်၁၁ရခဲ့ပါတယ်…
ဖာဂူဆန်အစအဆုံး တာဝန်ယူခဲ့ရတဲ့ ပထမဆုံးရာသီမှာတော့ ယူနိုက်တက်ဟာ အဆင့်၂နဲ့ ရာသီသိမ်းနိုင်ခဲ့တယ်။ အတော်လေးကို သိသာထင်ရှားတဲ့ တိုးတက်မှုဖြစ်ပါတယ်။ ဒါပေမယ့် အဲ့ဒီတိုးတက်မှုတွေက သိပ်တော့ကြာကြာမခံခဲ့ပါဘူး…
တကယ်တော့ အဲ့ဒီရာသီအစမှာ ဖာဂူဆန်ဟာ ဂျွန်ဘန်းစ်နဲ့ ပီတာဘတ်စ်လေတို့လို ကစားသမားကောင်းတွေကို အရခေါ်ဖို့ ကြိုးစားခဲ့တာပါ။ ဒါပေမယ့် နှစ်ဦးစလုံးက ယူနိုက်တက်ထက် လီဗာပူးကိုပဲ ရွေးချယ်သွားခဲ့တယ်။ ယူနိုက်တက်လည်း လီဗာပူးနဲ့၉မှတ်အကွာ အမှတ်ပေးဇယားရဲ့ ဒုတိယနေရာနဲ့ ရာသီသိမ်းခဲ့ရတယ်…
နောက်တစ်နှစ်မှာတော့ ဖာဂူဆန်ဟာ ဂတ်စ်ကွိုင်းလ်ကိုခေါ်ဖို့ အထူးတလည် ကြိုးပမ်းခဲ့တယ်။
“မင်းကို ခေါ်နိုင်ပြီဆိုပြီး ငါစိတ်ချလက်ချနဲ့ အားလပ်ရက်ခရီးထွက်လို့ရမလား” ဖာဂူဆန်က ဂတ်စ်ကွိုင်းလ်ကို ဒီလိုမေးခဲ့တယ်။ ဂတ်စ်ကွိုင်းလ်ကလည်း ယူနိုက်တက်ကိုပြောင်းမယ်လို့ နှုတ်ကတိဆန်ဆန် ပေးခဲ့တယ်လို့ ဆိုပါတယ်။ ဒါပေမယ့် ဖာဂူဆန် နွေရာသီအားလပ်ရက်ခရီး ထွက်သွားချိန်မှာပဲ စပါးက ဗြိတိန်စံချိန်တင်ပြောင်းရွှေ့ကြေးနဲ့ ဂတ်စ်ကွိုင်းလ်ကို အရခေါ်သွားခဲ့တယ်။ အဲ့ဒါ ၁၉၈၈ခုနှစ်ဖြစ်ပြီး ဂတ်စ်ကွိုင်းလ်ရဲ့ပြောင်းရွှေ့ကြေးက ပေါင်၂.၂သန်းပါပဲ။ စပါးဟာ ဂတ်စ်ကွိုင်းလ်ကိုရဖို့ စံချိန်တင်ပြောင်းရွှေ့ကြေး သုံးစွဲခဲ့တဲ့အပြင် ဂတ်စ်ကွိုင်းလ်အတွက် လက်မှတ်ထိုးကြေး ပေါင်တစ်သိန်းထိပေးခဲ့တယ်။ ဂတ်စ်ကွိုင်းလ်မိသားစုအတွက်လည်း အိမ်တစ်လုံးဝယ်ပေးခဲ့သလို ဂတ်စ်ကွိုင်းလ်ရဲ့ဖခင်ဖြစ်သူအတွက်လည်း BMWတစ်စီး ဝယ်ပေးခဲ့တယ်လို့ ဆိုပါတယ်…
၁၉၈၈-၈၉ဘောလုံးရာသီမှာတော့ ဂတ်စ်ကွိုင်းလ်ကိုရလိုက်တဲ့စပါးက အဆင့်၁၃ကနေ အဆင့်၆နေရာထိ တိုးတက်လာခဲ့တယ်။ ယူနိုက်တက်ကတော့ အဆင့်၂ကနေ အဆင့်၁၁ကို ပြန်ရောက်သွားပါတယ်…
နှစ်နှစ်ဆက်တိုက် ကစားသမားကောင်းတွေကို အပြိုင်ခေါ်ယူဖို့ ပျက်ကွက်ခဲ့ပြီးနောက်မှာတော့ ဖာဂူဆန်ဟာ ယူနိုက်တက်ရဲ့ကင်းထောက်စနစ်၊ ကစားသမားခေါ်ယူရေးစနစ် scouting & recruitmentတွေ အကုန်လုံးကို မြေလှန်ပြောင်းလဲပစ်ခဲ့တယ်…
၁၉၈၉နွေရာသီမှာ အပြောင်းအရွှေ့တွေကို သူကိုယ်တိုင် ထိပ်ဆုံးက ဦးဆောင်လာခဲ့တယ်။ နော်မန်ဝှိုက်ဆိုက်ဒ်နဲ့ ပေါလ်မတ်ဂရက်တို့လို အရေးပါတဲ့ကစားသမားတွေကို ရောင်းထုတ်ခဲ့တယ်။ အဲ့ဒီနောက် ပယ်လစ္စတာ၊ ပေါလ်အင့်စ်၊ မိုက်ဖီလန်၊ နေးလ်ဝက်ဘ်နဲ့ ဒန်နီဝဲလေ့စ်တို့ကို ပြန်လည်ခေါ်ယူခဲ့တယ်။ ဒါပေမယ့် ၁၉၈၉-၉၀ဘောလုံးရာသီမှာလည်း ယူနိုက်တက်ရဲ့ ရလဒ်တွေက ချက်ချင်းတိုးတက်မလာခဲ့ပါဘူး…
၁၉၉၀ဇန်နဝါရီလ ၁၅ရက်နေ့မှာ ယူနိုက်တက်ဟာ တန်းဆင်းဇုန်နဲ့ ၂မှတ်ပဲကွာတဲ့ အခြေအနေဖြစ်ခဲ့တယ်။ အဲ့ဒီအချိန်မှာပဲ နော်တင်ဟမ်ဖောရက်စ်နဲ့ FAဖလားအဝေးကွင်းပွဲစဉ် ကစားရဖို့ရှိလာတယ်။ ဒီပွဲသာ ရှူံးသွားခဲ့ရင် (အဲ့ဒီတုန်းက အခြေအနေအရ ရှူံးဖို့လည်း အတော်များ) ဖာဂူဆန်ရာထူးက ထုတ်ပယ်ခံရနိုင်တယ်ဆိုတဲ့ သုံးသပ်ချက်တွေလည်း ရှိခဲ့ပါတယ်…
သူ့နေရာကို နာမည်ကျော်နည်းပြတစ်ဦးဖြစ်တဲ့ ဟောင်းဝပ်ကန်ဒဲလ်နဲ့ အစားထိုးမယ်ဆိုတဲ့ သတင်းတွေဟာ ဆက်တိုက်ထွက်ပေါ်ခဲ့တယ်။ အဲ့ဒီမတိုင်ခင် လပိုင်းလောက်မှာပဲ ဗြိတိန်နာမည်ကျော်စီးပွားရေးလုပ်ငန်းရှင်တစ်ဦးဖြစ်တဲ့ မိုက်ကယ်နိုက်တန်ဟာ ယူနိုက်တက်ကို လွှဲပြောင်းဝယ်ယူဖို့ အနီးစပ်ဆုံး အခြေအနေထိဖြစ်ခဲ့သေးတယ်။ (ဒါကို ကျနော်တို့pageမှာ နောင်အလျဉ်းသင့်မှပဲ အသေးစိတ်ဖော်ပြပါဦးမယ်) သူသာ ယူနိုက်တက်ပိုင်ရှင်သစ်ဖြစ်လာရင် ဖာဂူဆန်နေရာမှာ ဘော်ဘီရော့ဘ်ဆင်နဲ့ အစားထိုးမယ်လို့လည်း နိုက်တန်က အရိပ်အမြွက်ပြောခဲ့ဖူးပါတယ်…
ယူနိုက်တက်နည်းပြရာထူးကနေ ဖာဂူဆန်ပြုတ်သွားဖို့ အနီးစပ်ဆုံးအချိန်တွေပဲဆိုပါတော့…
ဒါပေမယ့် ဖာဂူဆန်ကို အပြည့်အဝယုံကြည်ပေးခဲ့သူတွေလည်း ရှိခဲ့ပါတယ်။ အဓိကအားဖြင့်တော့ ယူနိုက်တက်ဘုတ်အဖွဲ့နဲ့ အမှုဆောင်ချုပ်မာတင်အက်ဒ်ဝပ်ပါပဲ…
“ဖောရက်စ်နဲ့ပွဲမတိုင်ခင်မှာ ဖာဂူဆန်နဲ့ ကျနော်သီးသန့်စကားပြောခဲ့တယ်။ ဒီပွဲရှူံးသွားသည့်တိုင်အောင် သူနည်းပြရာထူးမှာ ဆက်ရှိနေရမယ်လို့ ကျနော်အာမခံချက်ပေးခဲ့တယ်။ ကျနော်တို့ရဲ့ကင်းထောက်စနစ်တွေ၊ ကစားသမားခေါ်ယူရေးစနစ်တွေဟာ ခေတ်နောက်ကျကျန်နေခဲ့တာ အတော်ကြာပါပြီ။ အခုတော့ ဖာဂူဆန်က ဒါတွေအားလုံးကို ပြောင်းလဲပေးခဲ့တယ်။ ဒီအပြောင်းအလဲတွေရဲ့ အသီးအပွင့်ကို ခံစားရဖို့တော့ အချိန်တစ်ခုစောင့်ရပါမယ်။ ဒီနှစ်ဆိုရင် ကျနော်တို့ ကစားသမားကောင်း၅ယောက်ထိ ခေါ်ယူအားဖြည့်နိုင်ခဲ့တယ်။ ဒါပေမယ့် သူတို့တွေ အပြည့်အဝအထိုင်ကျသွားဖို့တော့ ကျနော်တို့အချိန်ပေးရဦးမှာပါ”
မာတင်အက်ဒ်ဝပ်က ဒီလိုပြောခဲ့တယ်။ မာတင်အက်ဒ်ဝပ်အပါအဝင် ယူနိုက်တက်ဘုတ်အဖွဲ့ရဲ့ အမြော်အမြင်ကြီးမားမှု၊ စိတ်ရှည်လက်ရှည် အချိန်ပေးမှုတွေကလည်း နောင်တစ်ချိန်ဖြစ်လာမယ့် သမိုင်းဝင်အောင်မြင်မှုတွေအတွက် တကယ်ပဲ အရေးပါခဲ့ပါတယ်…
ဖာဂူဆန်ရဲ့ဦးဆောင်မှုနဲ့အတူ ယူနိုက်တက်ဟာ အဲ့ဒီပွဲမှာ ဖောရက်စ်ကို အနိုင်ရခဲ့ရုံတင်မက နောက်ထပ်၄လကျော်အကြာမှာ FAဖလားကိုပါ ဆွတ်ခူးနိုင်ခဲ့တယ်။ ဒါဟာ ဖာဂူဆန်ရဲ့ ယူနိုက်တက်နည်းပြဘဝ ၄နှစ်ကျော်ကာလအတွင်း ပထမဆုံးသော ဆုဖလားအောင်မြင်မှုလည်း ဖြစ်လာခဲ့ပါတယ်…
“ကျနော်အပါအဝင် ဘုတ်အဖွဲ့တစ်ခုလုံးက ဖာဂူဆန်ကို အကြွင်းမရှိယုံပါတယ်။ သူနဲ့အတူ အောင်မြင်မှုတွေ အနှေးနဲ့အမြန်ရလာမယ်လို့ ကျနော်တို့အားလုံး ယုံထားကြတယ်။ နောက်ထပ်အချိန်တွေ ထပ်ပေးဖို့၊ ထပ်စောင့်ဖို့လည်း ကျနော်တို့ အသင့်ရှိပါတယ်။ ဒါပေမယ့် အခုလို သိပ်အကြာကြီးမစောင့်ရဘဲ ဖလားတစ်လုံး ရလာတဲ့အတွက်လည်း ကျနော်တကယ် ကျေနပ်မိပါတယ်။ ပရိသတ်ရဲ့ဖိအားကလည်း အတော်များနေတာဗျာ”လို့ မာတင်အက်ဒ်ဝပ်က ရှင်းပြခဲ့တယ်…
လတ်တလောအောင်မြင်သည်ရှိ၊ မအောင်မြင်သည်ရှိ ယူနိုက်တက်မှာဆိုရင် ပရိသတ်တွေရဲ့ဖိအားက သိပ်ကြီးမားလေ့ရှိတာတော့ အမှန်ပါပဲ။ အဲ့ဒီFAဖလားမရခင်ထိ အဲ့ဒီတစ်ရာသီလုံးနီးပါး ယူနိုက်တက်ပရိသတ်တွေဟာ ဖာဂူဆန်ကိုထုတ်ပယ်ဖို့ ဘုတ်အဖွဲ့ကို ဖိအားပေးခဲ့ကြတယ်။ အိုးထရက်ဖို့ဒ်ကွင်းထဲမှာဆိုလည်း “မင်းရဲ့ဆင်ခြေတွေကို ငါတို့ ၃နှစ်လောက် နားထောင်ပြီးသွားပြီ။ တော်လောက်ပြီ။ ဖာဂူဆန်… မင်းထွက်တော့”ဆိုတာမျိုး ပိုစတာတွေ၊ စာတန်းတွေကို မကြာခဏ မြင်လာရတယ်…
ဖာဂူဆန်ကိုယ်တိုင်ရဲ့ ဒီလိုဖိအားဒဏ်တွေကို အကောင်းဆုံးတောင့်ခံကျော်ဖြတ်ပြီး မဆုတ်မနစ်ကြိုးစားခဲ့မှု၊ မာတင်အက်ဒ်ဝပ်အပါအဝင် ဘုတ်အဖွဲ့တစ်ခုလုံးက သူ့ကိုအပြည့်အဝ ယုံကြည်ပေးခဲ့မှုတွေကပဲ ယူနိုက်တက်ခေတ်သစ်တစ်ခုကို ဖြစ်လာစေခဲ့ပါတယ်…
Comments
Post a Comment