ခမာမြေမှာ အရှုံးနဲ့ ထပ်မံ ရင်ဆိုင်လိုက်ရတဲ့ ရိုးရာကျား ထွန်းထွန်းမင်း

 

လက်စွမ်းက အသာကြီးဖြစ်ပေမယ့် ပရွန်ဆမ်နန်ကို အမှတ်ပေးနဲ့ ရှုံးနိမ့်သွားခဲ့တဲ့ ထွန်းထွန်းမင်း

မနေ့ညက ကစားခဲ့တဲ့ ခွန်ခမာခါးပတ်လုပွဲမှာ ထွန်းထွန်းမင်းဟာ အိမ်ရှင် ခမာလက်ဝှေ့သမား ပရွန်ဆမ်နန်ကို အသာစီးကနေ ထိုးနိုင်ခဲ့ပေမယ့် အမှတ်ပေးစည်းမျဉ်းနဲ့ရှုံးနိမ့်သွားခဲ့ပါတယ်။ ဒိုင်တွေဘယ်လို ဆုံးဖြတ်လိုက်လဲမသိပေမယ့် ထွန်းထွန်းမင်း ထိုးချက်တွေအောက်မှာ ပရွန်ဆမ်နန် တော်တော်လေး အထိနာခဲ့တာကတော့ သိသာခဲ့ပါတယ်။ ဒီပွဲဟာ ထွန်းထွန်းမင်းအတွက်ဆိုရင် အရေးကြီးပွဲစဉ်ဖြစ်ပြီး ၂၀၂၃ဆီးဂိမ်းစ်က ရှုံးကြွေးကိုအကြေဆပ်ခွင့်ရှိနေတာဖြစ်ပါတယ်။

ဆီးဂိမ်းတုန်းက အမှတ်ကွာဟချက်နဲ့ ရှုံးခဲ့တဲ့ ပရွန်ဆမ်နန်ကို ဒီပွဲမှာသာ အနိုင်ယူနိုင်ခဲ့ရင် ထွန်းထွန်းမင်းအနေနဲ့ အကြွေးဆပ်ပြီးသားလည်းဖြစ်မှာဖြစ်သလို လက်ဝှေ့လောကထဲ အတန်ငယ်ကျဆင်းနေတဲ့ သူ့ရဲ့ နာမည်ကိုလည်း ဆွဲတင်ပြီးသားဖြစ်မှာပါ။ ထွန်းထွန်းမင်းအတွက် သတိထားခဲ့ရတာကတော့ ခမာမြေမှာ ခမာစည်းမျဉ်းတွေနဲ့ ထိုးခဲ့ရတာပဲ ဖြစ်ပါတယ်။ အသက်အရွယ်ပိုင်းအခြားအရ ထွန်းထွန်းမင်းဟာ နောက်ပိုင်းမှာ သက်လုံပိုင်းသိသိသာသာ စကားပြောလာတဲ့သူဖြစ်ပေမယ့် ဒီပွဲအတွက် ကြံ့ခိုင်မှုပိုင်းရော သက်လုံပိုင်းပါ သေချာအားထည့်ထားတာကို မြင်နိုင်မှာပါ။

တစ်ဘက်မှာပရွန်ဆမ်နန်ကတော့ သူ့ရဲ့ ခန္ဓာကိုယ်တည်ဆောက်မှုနဲ့ သက်လုံပိုင်း သေချာပြင်ဆင်ထားလာခဲ့ပါတယ်။ ဒါ့အပြင် မြန်မာရိုးရာလက်ဝှေ့သမားတွေနဲ့လည်း မစိမ်းခဲ့ပဲ ပရွန်ဆမ်နန်အနေနဲ့ ဒေ့ဗ်နဲ့ရော ရာမန်နဲ့ပါ ထိုးထားဖူးတာ လပိုင်းပဲရှိသေးတာဖြစ်ပါတယ်။ ရိုးရာသမားတွေကို ခမာစည်းမျဉ်းနဲ့ ကစားရာမှာ မှတ်တမ်းကောင်းကို ထားရှိထားနိုင်ပြီး ဒေ့ဗ်ကိုပဲ သရေကျဖူးတာပါ။ ဒါကြောင့် ထွန်းထွန်းမင်းအနေနဲ့ ရိုးရာသမားတွေ နယ်မရွေးဘူးဆိုတာ သက်သေပြဖို့ရာလည်းလိုအပ်ခဲ့တာဖြစ်ပါတယ်။ ဒါပေမယ့် မြန်မာရိုးရာသမားတွေဟာ အမှတ်ပေးထက် အလဲထိုးအကွဲထိုးဘက်သာ စိတ်ပိုအားသန်တာကိုမဖျောက်နိုင်သေးပဲ ဒီပွဲမှာလည်း ထွန်းထွန်းမင်းအနေနဲ့ အပြတ်ဖြိုဖို့သာ ကြိုးစားခဲ့တာပါ။

ဒါကြောင့်ပွဲအပြီး ပရွန်ဆမ်နန်အနေနဲ့ထမ်းစင်နဲ့ ထမ်းမထုတ်သွားရရုံတမယ်ဖြစ်ခဲ့ပြီး တစ်ဘက်မှာ ထွန်းထွန်းမင်းကတော့ အချိုရည်သောက်မပျက်တာဖြစ်ပါတယ်။ ပွဲအတွင်းမှာ ထွန်းထွန်းမင်းအနေနဲ့ အောက်ပိုင်းတွေဖြိုခဲ့ပြီး ပရွန်ဆမ်နန်ကို တစ်လလောက်လမ်းကောင်းကောင်း မလျှောက်နိုင်အောင်လုပ်ခဲ့တာပါ။ လက်ဗလာရိုးရာသမားပီပီ လက်အိတ်နဲ့ထိုးရတာကို ထွန်းထွန်းမင်း အားမရပုံပါပဲ။ ဒါတောင် ချက်ကောင်းတွေလည်း ထိုးနိုင်ခဲ့ပါတယ်။ ထွန်းထွန်းမင်းအနေနဲ့ပရွန်ဆမ်နန်ကို မျက်နှာဖူးရောင်စေခဲ့သလို နံကြားတွေလည်းထည့်ခဲ့ပါတယ်။ ထွန်းထွန်းမင်းက အလိုက်သမား ပရွန်ဆမ်နန်က ခံထုးိသမားလိုဖြစ်နေတာပါ။

ဒါပေမယ့် ပွဲပြီးဆုံးချိန်မှာတော့ ဒိုင်က ဘယ်လိုဆုံးဖြတ်သွားလဲမသိ အိမ်ရှင် ပရွန်ဆမ်နန်က အနိုင်ရသွားခဲ့တာဖြစ်ပါတယ်။ ရိုးရာသမားတွေအနေနဲ့ စိတ်လွတ်ကိုယ်လွတ်ထိုးလာချိန် စည်းမျဉ်းသတ်မှတ်ချက်တွေနဲ့ထိုးရင် စည်းမျဉ်းအပေါ်လိုက်ပြီး အသာစီးမယူနိုင်တာ ဒီလိုပွဲမျိုးမှာသိသာပါတယ် ။ ဒိုင်က တစ်ပွဲလုံးဝင်တားနေပြီး ထိုးရတဲ့ အရှိန်လည်း တန့်တန့်သွားစေပါတယ်။ ပထမအချီခြေပိုက်မိကတည်းက ထွန်းထွန်းမင်းပွဲကိုဖြတ်နိုင်မှာဖြစ်ပေမယ့် ဒိုင်တားလိုက်တာကြောင့် ရပ်လိုက်ရပါတယ်။ သက်လုံးသက်ကွက်မကုန်သေးပဲ ဒိုင်ဝင်ဝင်ခံနေတာက မတူညီတဲ့ စည်းမျဉ်းကြောင့်နေမှာပါ။

ထွန်းထွန်းမင်းကလက်သီးပါဝါကတော့ မကျသေးပဲ အကယ်၍လက်အိတ်မဟုတ်ပဲ ဗလာလက်သီးသာဆိုရင် ပရွန်ဆမ်နန် ပထမအချီကတည်းကအမှတ်စဉ်ရေနေရမှာပါ။ ဒါပေမယ့်သက်လုံးပိုင်းမှကျတတိယအချီမှာ ထွန်းထွန်းမင်းကျသွားခဲ့ပြီး ပွဲကိုမဖြတ်နိုင်ခဲ့ပါဘူး။ မဖြတ်နိုင်ခဲ့တဲ့အကျိုးဆက်အနေနဲ့ ထိချက်သာပေမယ့် အမှတ်ပေးစနစ်မှာ အိမ်ရှင်ကို ဒိုင်တွေက အနိုင်ပေးသွားခဲ့တာဖြစ်ပါတယ်။ ထွန်းထွန်းမင်းအနေနဲ့ ရိုးရာရဲ့ ဂုဏ်ကိုအကောင်းဆုံးထမ်းတင်ခဲ့ပေမယ့် ကံမကောင်းခဲ့တာလည်းဖြစ်ပါတယ်။ ဒီပွဲနဲ့ ပတ်သက်ပြီး ကာယကံရှင်ထွန်းထွန်းမင်းကိုယ်တိုင်ကလည်း “ ကျနာ်အကောင်းဆုံးကြိုးစားခဲ့ပါတယ်ကံတရားက ကျနော့်ဘက် ပါမလာဘူးဆိုပြီးပြောသွားခဲ့ပါတယ်။ ဒီနိုင်ပွဲကြောင့် ပရွန်ဆမ်နန်ဟာ သွေးသစ်ဝင်လှိုင်ပြီးရင် ထွန်းထွန်းမင်းကိုရော ရာမန်ကိုပါ အနိုင်ယူနိုင်ခဲ့တဲ့ ဒုတိယမြောက် ကစားသမားဖြစ်လာခဲ့ပါတယ်။