ငယ်ချစ်နဲ့ အနှစ်တစ်ရာအထိဘဝကို ဖြတ်သန်းမယ့် ကိန်း
အင်္ဂလန်တိုက်စစ်မှူးဟာရီကိန်းနှင့်ဇနီးဖြစ်သူ ကိတ်ဂွတ်လန်းတို့က ငယ်ရွယ်စဉ်ကလေးဘဝကတည်းက သူငယ်ချင်းများဖြစ်ကြသည်။
တစ်နေ့တွင် သူတို့နှစ်ဦးအတူတက်သော ကျောင်းဖြစ်သည့် ချင်းဖို့ဒ်ဖောင်ဒေးရှင်းကျောင်းသို့ နာမည်ကျော်ကစားသမားတစ်ဦးရောက်လာခဲ့သည်။ ၎င်းကစားသမားကိုယ်တိုင်က လန်ဒန်မြို့အရှေ့မြောက်ဘက်တွင်ရှိသော ယင်းကျောင်း၌ ၁၉၈၀ ကျော်ခုနှစ်များက ပညာသင်ကြားဖူးသည့် ကျောင်းသားဟောင်းတစ်ဦးဖြစ်ပြီး နာမည်ကျော်အင်္ဂလန်ကွင်းလယ်လူဒေးဗစ်ဘက်ခမ်ဖြစ်သည်။ကိန်းရော ကိတ်ပါ သူတို့ အလွန်နှစ်သက်သည့် စံပြကစားသမားနှင့် ဓါတ်ပုံအတူတွဲရိုက်ခဲ့ကြသည်။
2005 ခုနှစ်တွင် ရိုက်ကူးခဲ့သည့် ယင်းဓါတ်ပုံလေးမှာ သူတို့မိသားစုအတွက် အလွန်အရေးပါသည့်အမှတ်တရ ပုံတစ်ပုံဖြစ်ခဲ့သည်။နောင်တစ်ချိန်တွင် ယင်းဓါတ်ပုံထဲမှ စကားပြောလျှင်လျှာလိတ်ပြီး မပီကလာပီကလာပြောတတ်သော လူငယ်လေးမှာ သူ၏စံပြကစားသမား ဒေးဗစ်ဘက်ခမ်၏ ခြေရာနင်းပြီး အင်္ဂလန်အသင်းခေါင်းဆောင်ဖြစ်လာခဲ့သည်။ပုံထဲက ဘက်ခမ်၏ ညာဘက်မှ မိန်းကလေးမှာ နောင်တစ်ချိန်တွင် ယင်းလူငယ်လေး၏ ပါရမီဖြည့်ဖက် ဇနီးသည်ဖြစ်လာခဲ့သည်။
ယင်းဓါတ်ပုံရိုက်ကူးပြီး နောင်(၇)နှစ်အကြာတွင် သူငယ်ချင်းနှစ်ဦး စတင်ချစ်ကြိုးသွယ်ခဲ့ကြပြီး နောက်(၅)နှစ်အကြာတွင် အိမ်ထောင်တစ်ခုကို အတူထူထောင်ခဲ့ကြသည်။လက်ရှိတွင် ငယ်ချစ်ဦး ကိတ်နှင့်ကိန်းက သားသမီး(၄)ဦးမွေးဖွားထားပြီး သာယာသောမိသားစုအိမ်ထောင်ရေးဘဝကို ဖြတ်သန်းနေကြပြီဖြစ်သည်။
Comments
Post a Comment