လူငယ်တွေနဲ့ အစွမ်းကုန် တောက်ပနေတဲ့ လီဗာပူး

 

အောင်ပွဲခံနေဆဲ လီဗာပူး

.

ချဲလ်ဆီးနဲ့ကာရာဘောင်းဖလားဗိုလ်လုပွဲတုန်းက ပွဲချိန်နှောင်းပိုင်းမှာ လူငယ်တွေကို ထုတ်သုံးပြီး ဖလားရခဲ့တဲ့အတွက် ချီးကျူးမှုတွေ အတောမသတ်သေးဘူး။ လီဗာပူးနည်းပြဂျာဂင်ကလော့က ဆောက်သမ်တန်နဲ့အက်ဖ်အေဖလားပွဲမှာလည်း လူငယ်တွေကို ပွဲထုတ်ခဲ့ပြန်တယ်။ အဲဒီပွဲမှာလည်း လီဗာပူး ဂိုးပြတ်အနိုင်ရခဲ့ပြန်တယ်။

.

လီဗာပူးတစ်သင်းလုံးနီးပါး တကယ့်အရန်တွေချည်းပဲ။ ဗန်ဒိုက်၊ ဆီမီကတ်စ်၊ ဂက်ပိုတို့ကလွဲလို့ ကျန်တာက လူငယ်တွေ။ လီဗာပူးရဲ့ပွဲထွက်လူစာရင်းမှာ အသက် ၂၅ နှစ်အထက် ကစားသမားက ၃ ယောက်ပဲပါတယ်။ ကျန်တာက ဆယ်ကျော်သက်ရွယ်၊ ၂၀ ဝန်းကျင်ကစားသမားတွေများတယ်။ ၆ ယောက်က ၂၁ နှစ်အောက်။ အဲဒါတောင် ဆောက်သမ်တန်ကို ဂိုးပြတ်အနိုင်ရခဲ့တာ ချီးကျူးစရာပဲ။

.

လီဗာပူးအတွက် အနိုင်ဂိုးတွေသွင်းခဲ့ကြတဲ့ လူးဝစ်ကူးမတ်စ်နဲ့ဂျေဒန်ဒန်းစ်တို့က အသက် ၁၈ နှစ်ပဲ ရှိကြသေးတယ်။ ပထမပိုင်းမှာ ကူးမတ်စ်က တစ်ဂိုးသွင်းတယ်။ ဒုတိယပိုင်းကျတော့ သူ့နေရာမှာ လူစားဝင်လာတဲ့ ဒန်းစ်က ၂ ဂိုးသွင်းတယ်။ ဟုတ်တော့ ဟုတ်နေတာပဲ။ ဒန်းစ်ဟာ ကာရာဘောင်းဖလားပွဲတုန်းက လူစားဝင်ကစားပြီး အခွင့်အရေးတွေ ရခဲ့ပါသေးတယ်။ ဒါပေမဲ့ ဂိုးမရခဲ့ဘူး။

.

ဒီပွဲမှာတော့ ၂ ဂိုးသွင်းနိုင်ခဲ့ပြီး ၁၉၉၇ ခုနှစ်တုန်းက ဂရင်းဘီနဲ့ပွဲမှာ မိုက်ကယ်အိုဝင် ဟတ်ထရစ်ရခဲ့ပြီးနောက် လီဗာပူးအသင်းသမိုင်းမှာ ၂ ဂိုးနဲ့အထက် သွင်းယူနိုင်တဲ့ အသက်အငယ်ဆုံးကစားသမားဖြစ်လာတယ်။ အခုဆိုရင် သူဟာ လီဗာပူးအတွက် ကစားခွင့်ရတာ ၃ ပွဲပဲ ရှိသေးတယ်။ ၂ ဂိုးသွင်းထားနိုင်ခဲ့ပြီ။ နောက်ထပ်ဂိုးတွေလည်း ထပ်လာဦးမယ်။

.

လီဗာပူးဟာ အခုဆိုရင် အက်ဖ်အေဖလားကွာတားဖိုင်နယ်အဆင့်ကို တက်ရောက်နိုင်ခဲ့ပြီ။ ကွာတားဖိုင်နယ်မှာ မဟာပြိုင်ဘက်ကြီး မန်ယူနဲ့ရင်ဆိုင်ရမယ်။ မန်ယူကို အကြိမ်ကြိမ်ဒုက္ခပေးနေကျ လီဗာပူးအနေနဲ့ဒီတစ်ကြိမ်မှာရော မန်ယူကို အခက်တွေ့စေဦးမလားဆိုတာ စိတ်ဝင်စားစရာပဲ။ လီဗာပူးဟာ အခုအချိန်ထိ ဖလား ၄ လုံး မျှော်လင့်ချက်ရှင်သန်နေတုန်းပဲ။

.

ဒဏ်ရာရကစားသမားတွေ များနေပေမယ့် လီဗာပူးက လူငယ်တွေရဲ့အားနဲ့အတူ ပုံစံမပျက်ခရီးဆက်နေတုန်းပဲ။ လီဗာပူးလူငယ်တွေကလည်း သူတို့ရဲ့အရည်အသွေးကို သက်သေပြနေကြတယ်။ စီနီယာတွေပြန်ကောင်းလာရင် သူတို့တွေ အရန်ခုံပြန်ရောက်သွားကြမှာဖြစ်ပေမယ့် ဒီလူငယ်တွေနဲ့အတူ လီဗာပူးရဲ့အနာဂတ်က တောက်ပနေတယ်လို့ ဆိုရမယ်။