နယူးကာဆယ်ကို အနိုင်ရပြီး
ပိုချက်အတွက် အသက်ရှုချောင်စေခဲ့တဲ့ ချယ်ဆီး
============================
မနေ့ညက ကစားခဲ့တဲ့ ချယ်ဆီးနဲ့ နယူးကာဆယ် ပွဲစဉ်မှာ ၃-၂ ဆိုတဲ့ ရလဒ်နဲ့ ချယ်ဆီးအသင်းဟာ အိမ်ကွင်းမှာ အနိုင်ရရှိခဲ့ပါတယ်။ အနှစ်ချုပ်ကို ပြောရရင်တော့ ချယ်ဆီးက နိုင်ရမယ့်ပွဲကို အနိုင်ကစားသွားတယ်ပဲ ပြောရမှာပါ။ စောစောစီးစီး ဂိုးရထားပေမယ့် ရိုးရာမပျက် နောက်တန်းအမှားတချို့ကြောင့် ပထမပိုင်းမပြီးခင်မှာပဲ ချယ်ဆီးတို့ ဂိုးပြန်ပေးခဲ့ရပါတယ်။
ဂျက်ဆင်ရဲ့သွင်းဂိုးကတော့ ပါးနပ်တယ်ပဲ ပြောရမလား၊ ကြက်တိုးတာပဲလား သူကိုယ်တိုင်ပဲ သိမှာပါ၊ ဘယ်လိုပဲဖြစ်ဖြစ် ဒီဒီယာ ဂျက်ဆင်တစ်ယောက် နောက်ဆုံး (၃) ပွဲဆက် ဂိုးသွင်းနိုင်ခဲ့ပါတယ်။ ကိုးပါးမားလ်ကတော့ ပြောစရာမလိုအောင် ဒီရာသီ ချယ်ဆီးအတွက် အကောင်းဆုံးကစားသမားတစ်ယောက်ပါ။
အနိုင်သေချာစေမယ့်ဂိုးကို သွင်းသွားတဲ့ မူဒရစ်ရဲ့ စွမ်းဆောင်ရည်က အားရစရာကောင်းပါတယ်။ အသင်းက ထွက်ခွာဖို့ အစီအစဉ်မရှိဘူးလို့ တစာစာအော်နေတဲ့ ပိုချက်ကို မူဒရစ်တစ်ယောက် ဆေ့ပေးခဲ့ပြန်ပြီလို့တောင် ပြောရမယ်ထင်ပါတယ်။ ပိုချက်အနေနဲ့ စတာလင်အစား မူဒရစ်ကိုသာ သေချာလေး နေရာပေးမယ်ဆိုရင် ပိုကောင်းတဲ့ စွမ်းဆောင်ရည်နဲ့ ရလဒ်တွေ ရလာနိုင်ပါလိမ့်မယ်။
ဒီအပွဲအနိုင်ကြောင့် ချယ်ဆီးဟာ ပရီးမီးယားလိဂ်မှာ (တစ်ပွဲကျန်) ၂၇ ပွဲကစားပြီးတော့ ၃၉ မှတ်နဲ့ မပြောင်းလဲဘဲ အဆင့် ၁၁ နေရာမှာပဲရှိနေသေးတယ်ဆိုပေမယ့် လက်ကျန်ပွဲစဉ်တွေကို သေချာကစားနိုင်မယ်ဆိုရင် ကွန်းဖရင့်လိဂ် ဝင်ခွင့်လောက်တော့ မျှော်လင့်လို့ရနိုင်မယ့် အနေအထားလေးတော့ ဖြစ်လာပါတယ်။
ချယ်ဆီးဖန် ညီအစ်ကိုတွေ အနေနဲ့ရော ဘယ်လိုထင်ကြလဲ ချယ်ဆီးအသင်းက ဥရောပ မှာ တစ်နေရာ မျှော်လင့်လို့ရနိုင်ပါဦးမလား …
#Chelsea
Comments
Post a Comment