စိုးရိမ်စရာကောင်းတယ်၊ ဒါပေမယ့် အရေးလည်းပါနေတယ်။ အဲ့ဒါ #ယူနိုက်တက် မှာ ဂျွန်နီအီဗန်စ်ရဲ့ လက်ရှိအနေအထားပါပဲ။ အသင်းရဲ့လက်ရှိအခြေအနေကိုလည်း ပေါ်လွင်စေတဲ့အချက် ဖြစ်ပါတယ်…
အီဗန်စ်ရဲ့လက်ရှိခြေစွမ်းဟာ ယူနိုက်တက်မှာ ဘယ်လိုမှပွဲထွက်ခွင့်ရသင့်တဲ့ အနေအထားမျိုးမဟုတ်တော့ဘူး။ သူကိုယ်တိုင်လည်း ပွဲတွေအများကြီးဝင်ကစားဖို့ ဒီကိုပြန်လာခဲ့တာ မဟုတ်လောက်ပါဘူး…
အသင်းကလည်း သူ့ကို ပဉ္စမဦးစားပေးနောက်ခံလူအနေနဲ့သာ ရည်ရွယ်ခေါ်ယူခဲ့တာဖြစ်ပါတယ်။ ပထမဦးစားပေးCBအတွဲအနေနဲ့ ဗာရန်း-လီချာရှိနေမယ်။ သူတို့ပြီးရင် မက်ဂွိုင်းယားနဲ့ လင်ဒီလော့ဖ်ရှိဦးမယ်။ အရာအားလုံးသာ ပုံမှန်အတိုင်းဖြစ်ခဲ့မယ်ဆိုရင် ဒီရာသီယူနိုက်တက်ရဲ့ ပြိုင်ပွဲစုံ၃၉ပွဲမှာ အီဗန်စ်ဝင်ကစားခွင့်ရတာ ၅ပွဲတောင် မပြည့်လောက်ပါဘူး…
ဝီဂန်တို့၊ နယူးပို့ကောင်တီတို့နဲ့တွေ့ခဲ့တဲ့ FAဖလားပွဲတွေလောက်ပဲ အီဗန်စ်ဝင်ကစားရဖို့ ရှိကောင်းရှိမယ်။ ဒါတောင် သိပ်မသေချာဘူးပြောရပါမယ်။ နည်းပြတန်ဟတ်ဟာ ဒီလိုပွဲတွေမှာလည်း အတတ်နိုင်ဆုံး အင်ပြည့်အားပြည့်အသုံးချတတ်တဲ့ အစဉ်အလာမျိုး ရှိနေလို့ပါပဲ…
ဘာနေနေ အားလုံးပုံမှန်အတိုင်းသာဆိုရင်၊ ဒဏ်ရာပြဿနာတွေ ကင်းရှင်းနေကြမယ်ဆိုရင် အီဗန်စ်ဟာ အခုအချိန်မှာ ၅ပွဲပြည့်အောင်ကစားရဖို့ သိပ်မရှိတာတော့ သေချာပါတယ်…
ဒါပေမယ့် အီဗန်စ်ဟာ ဒီရာသီမှာ စုစုပေါင်း၂၄ပွဲထိ ဝင်ကစားခဲ့ရတယ်။ နောက်ဆုံးမိနစ်တွေကျမှ ဝင်လာရတာတွေ၊ ပွဲပြီးဖို့ လေးငါး၊ဆယ်မိနစ်အလိုလောက်မှ ဝင်လာရတာတွေလည်းရှိတယ်။ ဒီရာသီ သူ့ရဲ့ပွဲကစားချိန်မိနစ်စုစုပေါင်းက ၁၂၇၀ကျော်ဖြစ်ပါတယ်။ ရာသီမစခင်လောက်က ကျနော်တို့မှန်းထားတာထက် အများကြီးပိုများတဲ့ ပမာဏတစ်ရပ်ပါပဲ…
ယူနိုက်တက်CBတွေထဲမှာ ဗာရန်းနဲ့ မက်ဂွိုင်းယားပြီးရင် ပွဲထွက်ခွင့်အများဆုံးက အီဗန်စ်လာဖြစ်နေတယ်။ လင်ဒီလော့ဖ်လည်း အီဗန်စ်ထက်ပိုများပေမယ့် သူက ပွဲစဉ်အများစုမှာ လိုအပ်ချက်အရ Left-backနေရာ ထွက်ကစားနေရတာဖြစ်ပါတယ်...
အဆင်တော့ ပြေမနေဘူးပေါ့။ ဒါပေမယ့် အီဗန်စ်မှာတော့ အပြစ်မရှိပါဘူး။ ပြောခဲ့ပြီးသလိုပဲ သူဟာ ပွဲတွေအများကြီးကစားဖို့ ဒီကိုပြန်ရောက်လာခဲ့တာ မဟုတ်ဘူး။ ဝါရင့်နောက်ခံလူတစ်ယောက်၊ ဒါမှမဟုတ် ယူနိုက်တက်ရွှေခေတ်မှာ တစ်စိတ်တစ်ဒေသ ပါဝင်ခဲ့ဖူးသူတစ်ယောက်အနေနဲ့ လူငယ်လေးတွေကို ထိန်းကျောင်းပေးဖို့၊ သိပ်အရေးမကြီးတဲ့ ပွဲစဉ်တချို့၊ အရေးပေါ်အနေအထားတချို့မှာ ကြိုကြားကြိုကြား ဝင်ကစားပေးဖို့လောက်ပဲ သူပြန်လာခဲ့တာဖြစ်ပါတယ်…
ဒါပေမယ့် ဒီရာသီယူနိုက်တက်မှာလည်း ဒဏ်ရာပြဿနာတွေက များလွန်းနေတယ်။ အရေးပေါ်အခြေအနေတွေက တောက်လျှောက်ဖြစ်နေတယ်။ ဒီလိုနဲ့ အီဗန်စ်ဟာ သူတကယ်ထမ်းနိုင်တဲ့ဝန်ထက် အများကြီးပိုထမ်းရဖို့လည်း ဖြစ်လာပါတယ်…
သူအတတ်နိုင်ဆုံးကြိုးစားနေတာလည်း အရမ်းသိသာပါတယ်။ အသက်အရွယ်နဲ့ ကြံ့ခိုင်မှုအရ ဒေါင်ဒေါင်မြည်CBတစ်ယောက်လို လုံခြုံမှုမျိုးတော့ သူမပေးနိုင်တော့ဘူး။ ဒါပေမယ့် သူ့မှာကျန်သလောက်တော့ အသင်းအတွက် သူအကုန်ပေးနေတာပါပဲ…
အခုနောက်ဆုံးအဲဗာတန်နဲ့ပွဲမှာဆိုရင် မိနစ်၉၀ပြည့်နီးပါး သူဝင်ကစားခဲ့တယ်။ ဖြတ်ထုတ်မှု၊ ပိတ်ဆို့မှု၊ ရှင်းထုတ်မှု စသည်ဖြင့် defensive action ၁၀ကြိမ်ထိ လုပ်နိုင်ခဲ့တယ်။ အသင်းကို clean-sheetရအောင် တစ်ဖက်တစ်လမ်းကနေ ကူညီပေးနိုင်ခဲ့ပါတယ်…
ဒေါင်ဒေါင်မြည်နောက်ခံလူတစ်ယောက်အနေနဲ့ဆိုရင် ဒီလောက်က ဘာမှစာဖွဲ့လောက်တဲ့ အကြောင်းအရာတော့ မဟုတ်ဘူး။ ဒါပေမယ့် အခုကျနော်တို့ပြောနေတာကလည်း ထိပ်တန်းအဆင့်မှာ ဆက်ကစားဖို့ ဘာမှမကျန်တော့ဘူးလို့ ပြောရမယ့် နောက်ခံလူတစ်ယောက်အကြောင်းဖြစ်ပါတယ်…
လာမယ့်တနင်္ဂနွေမှာ ယူနိုက်တက်ဟာ လီဗာပူးနဲ့ FAဖလားပွဲရှိနေပါတယ်။ အဲ့ဒီပွဲမှာ မက်ဂွိုင်းယား ပြန်ကစားနိုင်မယ်လို့တော့ မျှော်လင့်ရတယ်။ ဒါပေမယ့် စောင့်ကြည့်ရပါဦးမယ်။ အကယ်၍များ မက်ဂွိုင်းယား မကစားနိုင်သေးဘူးဆိုရင် အီဗန်စ်ကိုထပ်ပြီးတော့ လိုအပ်နေဦးမှာဖြစ်ပါတယ်…
အဆင်မပြေတာလည်း မပြေတာတစ်ပိုင်းဖြစ်ပြီး သူစွမ်းသလောက် သူကြိုးစားပေးခဲ့တာကိုတော့ အသိအမှတ်ပြုပါမယ်။ အသင်းကို အခြေအနေကောင်းလာအောင် သူအများကြီးတော့ မကူညီနိုင်ခဲ့ဘူး။ ဒါပေမယ့် သူသာမရှိရင် ဒီရာသီယူနိုက်တက်ဟာ ဒီထက်ပိုပြီး အခြေအနေဆိုးဖို့လည်း ရှိနေပါတယ်…
ယူနိုက်တက်ရဲ့ CBနေရာမှာ အီဗန်စ်ပွဲထွက်ခွင့်ရနေတာကိုက စိုးရိမ်စရာကောင်းနေတယ်။ ဒါပေမယ့် အသင်းမှာ သူ့ရဲ့အခန်းကဏ္ဍတစ်ခုကတော့ ရှိနေဆဲ၊ သူ့ကို လိုအပ်နေဆဲပါပဲ...
Comments
Post a Comment