အမှတ်ပေးဇယားထိပ်ဆုံးနေရာအတွက် ရင်အခုန်ရဆုံးပွဲရဲ့ အဖြေ

 

ပွဲက ကြည့်ရတာ ရင်ခုန်စိတ်လှုပ်ရှားစရာ ရသအပြည့်ပေးသွားလို့ ပွဲပြီးမှာတောင် စိုးရိမ်ရတဲ့အထိပဲ။ ဂွါဒီယိုလာနဲ့ ပရီးမီးယားလိဂ် နောက်ဆုံးရင်ဆိုင်ရတဲ့ပွဲမှာ ယာဂန်ကလော့ပ်ကသရေလောက်နဲ့မကျေနပ်ဘဲ နိုင်ပွဲရဖို့ သူ့ကစားသမားတွေကို ဘယ်လောက်တောင် Moti ပေးထားလဲဆိုတာ အထင်အရှားတွေ့ရမယ်။လူးဝစ်ဒီယက်ဇ်ဆိုရင် အဆုတ် ၃ ခုများ ပါသလားလို့ထင်ရတဲ့အထိ တစ်ပွဲလုံးကို မမောမပန်းဘဲ အားကြိုးမာန်တက်ကစားသွားတာကိုတွေ့ရတော့ ကိုယ်တွေ ယူနိုက်တက်က ရပ်ရှ်ဖို့ဒ်တစ်ယောက် လူးဝစ်ဒီယက်ဇ်လောက်သာအားထုတ်မှုရှိရင် ဘယ်လောက်ကောင်းမလဲလို့ မဆီမဆိုင် တွေးမိခဲ့ပြန်တယ်။

လီဗာပူးလ်ကွင်းလယ်က အန်ဒိုနဲ့မက်အယ်လစ္စတာတို့ရဲ့ ရုန်းအား၊ ဖျက်အားတွေကြားမှာမန်စီးတီးတိုက်စစ်တစ်ခုလုံး ကျရှုံးခဲ့ပြီး ဘာနာဒိုဆေးလ်ဗားအတွက် ပြေးလမ်းကြောင်း Channel တွေ မရှိလို့ ဘာနာဒိုဆေးလ်ဗား ကွင်းထဲမှာ ရှိနေတယ်လို့တောင် မထင်ရဘူး။ဒီဘရိုင်းနားက လီဗာပူးလ် ခံစစ်ကို ထိုးဖောက်နိုင်မဲ့ အဖြေကို ရှာမတွေ့ဘဲ နောက်ဆုံး အရန်ခုံရောက်သွားတော့တယ်။ ဟာလန်းကတော့ သူ့ရဲ့ Clone များ ကျောနံပါတ် ၉ ဂျာစီ ဝတ်ပြီး ဝင်ကစားတာလားလို့ ထင်ရလောက်အောင် ရှေ့မှာ အရူးတစ်ယောက်လို လျှောက်ပြေးနေတာလွဲရင် ဘာမှကို မလုပ်ပြနိုင်ခဲ့ဘူး။

ဗန်ဒိုက်က ဟာလန်းကို အိတ်ကပ်ထဲ ထည့်ပြနိုင်ခဲ့သလို ဟာလန်းရဲ့ ရှားရှားပါးပါး ဂိုးပေါက်ကန်ချက် တစ်ကြိမ်ကလည်း ဂိုးသမားဆီ တည့်တည့်ရောက်သွားခဲ့ပြန်တယ်။ မန်စီးတီးတိုက်စစ် Network တစ်ခုလုံး ဖရိုဖရဲဖြစ်နေပေမဲ့ ခံစစ်ပိုင်းက စနစ်တကျကစားနိုင်ပြီး ဝေါ်လ်ကာ၊ အကီ၊ ဂျွန်စတုန်းစ်၊ အကန်ဂျီ၊ ရိုဒရီတို့ရဲ့ စုဖွဲ့မှု ကောင်းမွန်မှုကြောင့် လီဗာပူးလ်တို့ ပထမပိုင်းတစ်ပိုင်းလုံး မန်စီးတီးအသင်း Final Third Zone ထဲမှာ အခွင့်အရေးကြီးကြီးမားမား မရခဲ့ဘူး။

ပယ်နယ်တီဧရိယာထိပ်နားကနေ လူးဝစ်ဒီယက်ဇ် ကန်ချက်တစ်ကြိမ်အပါအဝင် အများစုက မပိုင်ဘဲ လှမ်းကန်ရတာမျိုးဖြစ်ပြီး ပထမပိုင်းမှာလည်း ဂိုးပေါက်တည့်ချက် ၁ ကြိမ်သာရှိခဲ့တယ်။ န်စီးတီး ရသွားတဲ့ ဂိုးကတော့ တကယ့်ကို ပညာသားပါတယ်လို့ပြောရမယ်။ ဂျွန်စတုန်းစ်အတွက် Space ရအောင် အကီက မက်အယ်လစ္စတာကို Push လုပ်ပြီး

ဒီဘရိုင်းနားကလည်း အဲဒီ လွတ်နေတဲ့ Space ထဲကို ချိန်သားကိုက် တင်ပေးလိုက်ချိန်မှာ ဂျွန်စတုန်းစ်က ပြေးဝင်ပိတ်သွင်းခဲ့တာဖြစ်တယ်။ အကီကို အဲဒီဂိုးအတွက် ကျေးဇူးတင်ရမှာဖြစ်သလို သူ့ကြောင့်ပဲ ပယ်နယ်တီပေးခဲ့ရလို့ Hero ကနေ Zero ပြန်ဖြစ်ခဲ့ရတယ်။

နောက်ပြီး ဂိုးသမား အီဒါဆင်ပါ ဒဏ်ရာရသွားလို့ အကီ တစ်ကွက်ပြလိုက်တာ ၂ ကျပ်ကွက် မိသွားတယ်လို့ပြောရမယ်။ အဲဒီ ပယ်နယ်တီကို မက်အယ်လစ္စတာက အမှားအယွင်းမရှိကန်ပြီး ချေပဂိုးပြန်သွင်းခဲ့တယ်။ ဒုတိယပိုင်းမှာ ဆာလာ ဝင်လာပေမဲ့ ရာနှုန်းပြည့်ကြံ့ခိုင်မှုရှိပုံမရလို့ ညာခြမ်းတိုက်စစ်က အရမ်းကြီး မလှုပ်ပေမဲ့ ဆာလာရဲ့ Through Ball တွေက တော်တော်လေး ထိရောက်ခဲ့တယ်။

ဒုတိယပိုင်းမှာ ဒါဝင်နူးနက်ဇ်ရဲ့ အပိုင်ပိတ်သွင်းချက်ကို ဂိုးသမားအော်တေဂါ ကာကွယ်နိုင်သလို မန်စီးတီးဘက်ကလည်း ဒိုကူရဲ့ကန်ချက် ဂိုးတိုင်ထိထွက်ခဲ့တာ၊ ဖိုဒန်ရဲ့ မဆီမဆိုင် အခွင့်အရေးတစ်ကြိမ် ဂိုးဘားတန်းထိခဲ့တာကြောင့် နှစ်သင်းစလုံးအတွက် နစ်နာခဲ့ပြီး တကယ်လို့သာ အခွင့်အရေးတိုင်း ဂိုးဝင်မယ်ဆိုရင် ဒီပွဲက ၁-၁ မဟုတ်ဘဲ ၅-၅ ဂိုးလောက်အထိဖြစ်သွားနိုင်တယ်။အခုပွဲ ရလဒ်က နှစ်သင်းစလုံးအတွက် မျှတတဲ့ရလဒ်ဖြစ်ပြီး ယာဂန်ကလော့ပ်နဲ့ ဂွါဒီယိုလာတို့ရဲ့ ပရီးမီးယားလိဂ် နောက်ဆုံးဆုံတွေ့မှုမှာ အရှုံးအနိုင်အဖြေမပေါ်ဘဲ သရေနဲ့အဆုံးသတ်ခဲ့ရတယ်။

 

တကယ်ဆိုရင် ဒီဘရိုင်းကို လူစားလဲတာ ဂွါဒီယိုလာ ကောင်းကောင်းလုပ်နိုင်ခဲ့တဲ့ အလှည့်အပြောင်းလို့ မြင်တယ်။ ဒုတိယပိုင်းမှာ မန်စီးတီးက လီဗာပူးလ်စိုးမိုးတာကို ခံနေရပြီ။ ကွင်းလယ်ချင်း မယှဉ်နိုင်တော့ဘူး။ အထူးသဖြင့် ဘောလုံးကိုင်မကစားနိုင်တော့ လီဗာပူးလ်ဖိအားပေးတာကို တောက်လျှောက်ခံနေရတာပါ။

ဒီဘရိုင်းလှုပ်မရအောင်၊ သူ့ဆီက ဘောလုံးထွက်မလာအောင် လီဗာပူးလ်က စနစ်တကျပိတ်ဆို့ထားနိုင်တယ်။ ဟာလန်းက ဗန်ဒိုက်နဲ့တင် ငြိမ်သွားပြီ။ ဒီဘရိုင်းကို အန်ဒို၊ အယ်လစ္စတာတို့က ပိတ်ထားတာမို့ ဂွါဒီယိုလာ အလှည့်အပြောင်းလုပ်ကို လုပ်ရတော့မှာပဲ။

ဒါကြောင့် သူ့ရဲ့ အကောင်းဆုံးကွင်းလယ်လူကို ၆၈ မိနစ်တည်းနဲ့ ကွင်းပြင်ပြန်ထုတ်လိုက်ရတာပဲ။ ဒိုကူနဲ့ ကိုဗာဆစ်ကိုထည့်တယ်။ ဒိုကူရဲ့ အားကိုယူပြီး နိုင်ရင်နိုင်၊ မနိုင်ရင် သရေရအောင်ယူမယ်လို့ ဆုံးဖြတ်ခဲ့ပုံပဲ။ ဒီဘရိုင်းကို ဆက်သုံးနေရင် မန်စီးတီးရှုံးရင်တောင် ရှုံးနိုင်ခဲ့ပါတယ်။

ကစားသမားက မကျေနပ်ခဲ့တာမှန်ပေမယ့် ဂွါဒီယိုလာ လုပ်ခဲ့တာက မှန်ကန်ခဲ့ပြီး အဝေးကွင်းမှာ သရေတမှတ်ယူနိုင်ခဲ့ပါတယ်။

လီဗာပူးလ်နဲ့ပွဲမှာ ပွဲချိန်အစောကြီး လူစားလဲခံရတဲ့နောက် ဒီဘရိုင်းတယောက် မကျေမနပ်တွေဖြစ်ခဲ့ပါတော့တယ်။ ကွင်းဘေးမှာတင် ဂွါဒီယိုလာနဲ့ စကာားတွေ အချေအတင်ပြောခဲ့ပြီး သူ့ မကျေနပ်ချက်ကို ပြသခဲ့ပါတယ်။ အရန်ခုံတန်းမှာလည်း စူပုပ်နေခဲ့ပြီး ဂွါဒီယိုလာက သူ့အနားရောက်လာကာ လူစားလဲရတာ ဘာလို့လဲဆိုပြီး ရှင်းပြခဲ့ရပါသေးတယ်။

ဂွါဒီယိုလာကလည်း အသင်းက ဘောလုံးကိုင်မကစားနိုင်အောင်ဖြစ်နေလို့ အပြောင်းအလဲလုပ်ဖြစ်အောင် လုပ်ရတာပါပဲ။ ဒုတိယပိုင်းမှာ ဒီဘရိုင်းက လီဗာပူးလ်ကစားသမားတွေရဲ့‌ ရေဒါအောက်ရောက်နေပြီး ဘာမှကို မလုပ်ပြနိုင်တော့ပါဘူး။ သူ ရုန်းကန်နေရပြီး ဂွါက အဲဒါကြောင့် လူစားလဲခဲ့တာပါ။

"သူ အဲလိုဖြစ်တာမြင်တော့ ကျနော်ပျော်ပါတယ်၊ လူစားလဲခံရတာကို အံ့အားသင့်တယ်ဆိုရင် ပိုတောင်မှ သဘောကျပါတယ်၊ ကျနော်မှားတယ်ဆိုရင် လာမယ့်ပွဲမှာ သူ သက်သေပြလို့ရမှာပါ" လို့ ပါးပါးနပ်နပ်ပဲပြောသွားပါတယ်။ ဖြစ်လေ့ဖြစ်ထရှိတဲ့ အရာပါပဲ။ နည်းပြက သူလုပ်စရာရှိတာလုပ်တယ်၊ ကစားသမားကလည်း သူမကျေနပ်တာကို ပြခဲ့ပါတယ်။