နိုင်ပွဲပျောက်ဆုံးမှုတွေနဲ့အတူ အကုန်ပတ်ရမ်းနေတဲ့ တန်ဟဂ်

 

အသင်းဆေးအဖွဲ့ဘက် ဦးလှည့်လိုက်ပြန်တဲ့ တန်ဟက်

တန်ဟက်ရဲ့ဒုတိယမြောက်ရာသီမှာ မန်ယူအသင်း ပြဿနာအထွေထွေနဲ့တိုင်ပတ်နေတာ အားလုံးအသိပါ။ သူ့အသင်းကလည်း ပြဿနာတွေစုံတယ်။ ဒဏ်ရာပြဿနာ၊ လူမှုရေးပြဿနာတွေနဲ့ရှုပ်ယှက်ခတ်။ စည်းကမ်းပိုင်းမလိုက်နာမှုတွေကလည်းရှိ၊ အသင်းကလည်း တစ်နေ့ရွှေတစ်နေ့ငွေဆိုတော့ တန်ဟက်အတွက် လုပ်ရကိုင်ရတာ အတော်ခက်မယ်။

တန်ဟက်အတွက် စိတ်ပျက်စရာတွေ တပုံတပင်ကြီးဖြစ်လိမ့်မယ်။ အခုအခါမှာ တန်ဟက်အတွက် စိတ်တိုင်းမကျစရာဖြစ်လာရတာကတော့ မန်ယူအသင်းဆေးအဖွဲ့ပါပဲ။ တန်ဟက်က ဘယ်နောက်ခံနေရာအတွက် လုခ်ရှောနဲ့မာလာစီယာတို့ကို ဦးစားပေးသုံးစွဲချင်တယ်။ ဘယ်နောက်ခံလူစစ်စစ်ဖြစ်တဲ့ ရယ်ဂူလွန်က အငှားစေ့လို့ မန်ယူက ပြန်ထွက်သွားပြီ။

အဲဒီတော့ တန်ဟက်ဟာ ဘယ်နောက်ခံအစွန်နေရာအတွက် ဗဟိုခံစစ်သမားလင်ဒီလော့ဖ်၊ ကွင်းလယ်ခံစစ်သမားအမ်မရာဘတ်တို့ကို မရှိသုံးသုံးနေရတယ်။ သူတို့လည်း ကြိုးစားကြပေမယ့် ကိုယ်အားသန်တဲ့နေရာမဟုတ်တော့ ဘယ်လိုအကောင်းဆုံးခြေစွမ်းပြနိုင်ပါ့မလဲ။ ဒီတော့ တန်ဟက်က လုခ်ရှောဖြစ်ဖြစ်၊ မာလာစီယာကိုဖြစ်ဖြစ် ပြန်သုံးချင်တယ်။

ဒီအတွက်လည်း မန်ယူဆေးအဖွဲ့ကို တောင်းဆိုတာတွေ ရှိပါလိမ့်မယ်။ မန်ယူဆေးအဖွဲ့က သူတို့နှစ်ယောက်စလုံး ၂၀၂၄ ဇန်နဝါရီလမှာ ပြန်ကောင်းလာကြလိမ့်မယ်လို့ ၂၀၂၃ နှစ်ကုန်ပိုင်းမှာ ပြောခဲ့တယ်။ ဒါပေမဲ့ သူတို့ပြောသလို ဖြစ်မလာဘူး။ လုခ်ရှောနဲ့မာလာစီယာတို့က ပြန်ကောင်းမလာတဲ့အပြင် ရာသီကုန်အထိပါ နားရမလိုဖြစ်နေပြီ။

အမှန်တော့ တန်ဟက်က ဆေးအဖွဲ့ကို အသင်းတွင်းပဲ သိုသိုသိပ်သိပ်ဖိအားပေးခဲ့တာပါ။ မန်ယူဆေးအဖွဲ့က အာမခံထားသလို ဖြစ်မလာတဲ့အခါ ဒီပြဿနာကို တန်ဟက်က လူသိရှင်ကြားထုတ်ပြောလာခဲ့တာပါ။ အသင်းဆေးအဖွဲ့နဲ့စကားပြောတဲ့အခါ လုခ်ရှောနဲ့မာလာစီယာတို့ ဇန်နဝါရီလမှာ ပြန်ကောင်းလာစေရမယ်လို့ အာမခံတယ်။ ဒါပေမဲ့ ဖြစ်မလာတာကြောင့် တော်တော်စိတ်ပျက်ရတယ်လို့ တန်ဟက်က ဖွင့်ဟတယ်။

တန်ဟက်အတွက် မန်ယူကို စရောက်တဲ့ရာသီက သိပ်မဆိုးလှဘူး။ လိဂ်ဖလားတစ်လုံးဆွတ်ခူးနိုင်ခြင်းနဲ့အတူ တိုးတက်လာမယ့် အရိပ်အယောင်တွေ မြင်တွေ့ရတယ်။ ဒါပေမဲ့ ဒုတိယရာသီကတော့ တော်တော်ဆိုးဆိုးရွားရွားပဲ။ ပြဿနာတွေကစုံ၊ အသင်းကရလဒ်တွေဆိုးရွား။ ရာသီအဆုံးမှာ ချန်ပီယံလိဂ်ဝင်ခွင့်မရခဲ့ရင်တော့ မန်ယူကနေ တန်ဟက် ထွက်ခွာသွားရလောက်ပါတယ်။