ကစားသမားဘဝတုန်းက တစ်ခါမှ မရခဲ့ဖူးတဲ့ အာဖရိကနိုင်ငံများဖလားကို အိုင်ဗရီကို့စ်အသင်း ဆွတ်ခူးနိုင်ဖို့ အကြီးအကျယ်အားပေးခဲ့တဲ့ ဂန္ထဝင်ကြီးဒရော့ဘာ . .

 

အိုင်ဗရီကို့စ်ဂန္ထဝင်တိုက်စစ်မှူးဒရော့ဘာဟာ ၂၀၂၃ အာဖရိကနိုင်ငံများဖလားပြိုင်ပွဲမှာ

သူ့နိုင်ငံအသင်း ဗိုလ်လုပွဲတက်ရောက်ခွင့်ရရှိသွားပြီးတဲ့နောက် အကြီးအကျယ်အောင်ပွဲခံခဲ့ပါတယ်။

အိုင်ဗရီကို့စ်အသင်းဟာ DR ကွန်ဂိုနဲ့ ဆီမီးဖိုင်နယ်ပွဲမှာ ၁-၀ ဂိုးနဲ့အနိုင်ရခဲ့ပြီး

အဖိုးတန်ဂိုးကို ၆၅ မိနစ်မှာ နာမည်ကျော်တိုက်စစ်မှူးဟော်လာက

မြေမကျကန်ချက်နဲ့ လှလှပပ သွင်းယူခဲ့တာဖြစ်ပါတယ်။

၂၀၂၃ အာဖရိကနိုင်ငံများဖလားပြိုင်ပွဲ အိမ်ရှင်အသင်းဖြစ်တဲ့ အိုင်ဗရီကို့စ်ဟာ ဗိုလ်လုပွဲအထိ

ရောက်လာမယ်လို့ ဘယ်သူကမှ မထင်ကြဘဲ အုပ်စုတွင်းမှာ ၁ ပွဲနိုင်၊ ၂ ပွဲရှုံး၊

၃ မှတ်သာရရှိခဲ့တာကြောင့် နည်းပြဖြစ်သူ လူးဝစ်ဂတ်ဆက်ဟာ ရာထူးက အထုတ်ခံရပြီး

အိုင်ဗရီကို့စ်ဘောလုံးအဖွဲ့ချုပ်က အီမာ့စ်ဖေးကို ယာယီနည်းပြအဖြစ် ခန့်အပ်ခဲ့ပါတယ်။

 

ဒါပေမဲ့ အိုင်ဗရီကို့စ်အသင်းဟာ ကံကြမ္မာရဲ့ဖေးမမှုရရှိခဲ့ပြီး အကောင်းဆုံးတတိယ ၄ သင်းစာရင်းမှာ

အဆင့် ၄ နေရာနဲ့ ပွတ်ကာသီကာ နောက်တစ်ဆင့်တက်ခဲ့သလို ရှုံးထွက် ၁၆ သင်းအဆင့်မှာတော့

လက်ရှိချန်ပီယံ ဆီနီဂေါနဲ့ ဆုံတွေ့ခဲ့တာကြောင့် အိုင်ဗရီကို့စ်တို့ ပြိုင်ပွဲကနေ ထွက်ရပြီလို့ အားလုံးက ယူဆခဲ့ကြပါတယ်။

ဒါပေမဲ့လည်း မယုံနိုင်လောက်အောင်ပဲ အိုင်ဗရီကို့စ်အသင်းက

ဆီနီဂေါကို ပယ်နယ်တီအဆုံးအဖြတ်နဲ့ ဖြုတ်ချနိုင်ခဲ့သလို ကွာတားဖိုင်နယ်မှာ

မာလီကို ၂-၁ ဂိုး၊ အခု ဆီမီးဖိုင်နယ်မှာ DR ကွန်ဂိုးကို ၁-၀ ဂိုးတွေနဲ့ အနိုင်ယူပြီးတော့

၂၀၁၅ နောက်ပိုင်း ဝေးကွာနေတဲ့ အာဖရိကနိုင်ငံများဖလားဗိုလ်လုပွဲကို ပြန်လည်တက်ရောက်နိုင်ပြီဖြစ်ပါတယ်။

DR ကွန်ဂိုနဲ့ပွဲကို အိုင်ဗရီကို့စ်ဂန္ထဝင်တိုက်စစ်မှူးဒရော့ဘာဟာ ကွင်းထဲအထိ

ကိုယ်တိုင်ကိုယ်ကျ လာရောက်အားပေးခဲ့ပြီး ကွင်းလယ်ဒိုင်က ပွဲပြီးခရာမှုတ်လိုက်ချိန်မှာတော့

ဒရော့ဘာတစ်ယောက် ဟန်တောင်မဆောင်နိုင်ဘဲ အိုင်ဗရီကို့စ်ပရိသတ်တွေနဲ့အတူ အကြီးအကျယ်အောင်ပွဲခံခဲ့ပါတယ်။

အသက် ၄၅ နှစ်အရွယ်ရှိပြီဖြစ်သူ ဒရော့ဘာဟာ လက်ရွေးစင်ကစားသမားဘဝတုန်းက

အိုင်ဗရီကို့စ်အသင်းအတွက် ၁၀၅ ပွဲကစား၊ ၆၅ ဂိုးသွင်းခဲ့ပြီး

အသင်းသမိုင်းတစ်လျှောက် သွင်းဂိုးအများဆုံးအဖြစ် ရပ်တည်နေပါတယ်။

ဒရော့ဘာရဲ့ကလပ်ကစားသမားဘဝမှာ ပရီးမီးယားလိဂ်၊ ချန်ပီယံလိဂ်၊ FA ဖလားအပါအဝင်

ကြီးမားတဲ့ဆုဖလားအောင်မြင်မှုတွေ ရယူနိုင်ခဲ့ပေမဲ့ အံ့အားသင့်စရာကောင်းတာက

နိုင်ငံအသင်းအတွက် ဆုဖလားအောင်မြင်မှု မယူနိုင်ခဲ့တာပါပဲ။

ဒရော့ဘာဟာ အာဖရိကနိုင်ငံများဖလားပြိုင်ပွဲမှာ အိုင်ဗရီကို့စ်အသင်းနဲ့အတူ

၂၀၀၆၊ ၂၀၁၂ ခုနှစ်တွေမှာ ဗိုလ်လုပွဲတက်ခဲ့ပေမဲ့ နှစ်ကြိမ်စလုံး ဒုတိယနဲ့သာကျေနပ်ခဲ့ရပါတယ်။

အိုင်ဗရီကို့စ်အသင်း ၂၀၁၅ ပြိုင်ပွဲမှာ ဗိုလ်စွဲနိုင်ခဲ့ပေမဲ့ အဲဒီမတိုင်ခင် ၁ နှစ်အလိုမှာပဲ

ဒရော့ဘာက လက်ရွေးစင်အသင်းကနေ အနားယူခဲ့ပြီးဖြစ်ပါတယ်။

အခုအချိန်မှာတော့ ဒရော့ဘာဟာ သူ မပိုင်ဆိုင်ဖူးခဲ့တဲ့ အာဖရိကနိုင်ငံများဖလားချန်ပီယံဆုကို

လက်ရှိမျိုးဆက်ကစားသမားတွေ ကိုင်မြှောက်ခွင့်ရတာကို မြင်တွေ့ရဖို့ ဆန္ဒပြင်းပြနေတာလည်းဖြစ်ပါတယ်။