မန်ယူအသင်းကို ရော်နယ်ဒိုစရောက်လာပုံက
အိပ်မက်ဆန်တယ်။ အဲ့ဒီအချိန်တုန်းက
အင်တာနက်တွေမထွန်းကားသေးဘူး။
ဆံပင်ကေလေးနဲ့ နာမည်ကလည်း ရော်နယ်ဒိုဆိုပဲ။ အဲ့ဒီနာမည်ကြောင့်ပဲ ဒီချာတိတ်လေးကို
အားလုံးကစောင့်ကြည့်ခဲ့ကြတယ်။ အဲ့ဒီမတိုင်ခင် ဘရားဇီးအသင်းရဲ့ ရော်နယ်ဒိုဆိုတဲ့ ဒိုကြီးက ဘောလုံးကမ္ဘာကို သိမ်းပိုက်ခဲ့တာမလား။
ဒီလိုနဲ့ မန်ယူအသင်းရဲ့ ကျောနံပါတ် ၇ နဲ့အတူ
ရော်နယ်ဒိုဆိုတဲ့ ချာတိတ်လေး အိုးထရက်ဖို့ဒ်ကွင်းထဲ ဝင်လာတဲ့ အချိန်ကို ပရိသတ်တွေမျှော်ခဲ့ကြတယ်။ အခုတော့ ဒီချာတိတ်လေးက ၃၉ နှစ်ဆိုတဲ့ အသက်အရွယ်ကို ရောက်လာခဲ့ပြီဖြစ်ပါတယ်။
အခုထိ ရော်နယ်ဒိုဆိုတဲ့ နာမည်က ပရိသတ်တွေ
ရင်ထဲမှာ နေရာယူထားတုန်းပဲ။
စပို့တင်းကနေ စတင်ခဲ့တဲ့ ရော်နယ်ဒိုရဲ့
ကလပ်အသင်း ကစားသမားဘဝက
အခုဆိုရင် အယ်နာဆာအသင်းသားအဖြစ်နဲ့
ဘောလုံးလောကထဲမှာ ရှင်သန်နေတုန်း။
ညက ကစားသွားခဲ့တဲ့ အယ်ဖေဟာအသင်းနဲ့
အာရှချန်ပီယံလိဂ် ၁၆ သင်းရှုံးထွက်အဆင့်
ပ-ကျော့ပွဲမှာ ရော်နယ်ဒိုက သူ့ရဲ့ကလပ်အသင်း
ကစားသမားဘဝ ပွဲ ၁၀၀၀ ပြည့်ခဲ့တယ်။
ရော်နယ်ဒိုဟာ ကလပ်အသင်းကစားသမားအဖြစ်
စပို့တင်းအသင်းနဲ့ ၃၁ ပွဲ၊ မန်ယူနဲ့ ၃၄၆ ပွဲ
ရီးရဲလ်နဲ့ ၄၃၈ ပွဲ၊ ဂျူဗင်တပ်နဲ့ ၁၃၄ ပွဲ၊
အခုအယ်နာဆာနဲ့ ၅၁ ပွဲ ကစားပေးထားခဲ့တာပါ။
အဲ့ဒီလို ကလပ်ကစားသမားဘဝ ပွဲ ၁၀၀၀ ပြည့်တဲ့ ပွဲမှာပဲ ရော်နယ်ဒိုက အသင်းအတွက် အရေးပါတဲ့ အနိုင်ဂိုးကို ၈၁ မိနစ်မှာ သွင်းပေးနိုင်ခဲ့တယ်။ အယ်နာဆာအသင်းက အခုပွဲမှာ အသာရခဲ့သလို ဂိုးသွင်းခွင့်တွေလည်း ရခဲ့ပေမယ့် ဂိုးရဖို့ကို ခက်နေခဲ့တယ်။ ပွဲချိန် ၈၁ မိနစ်အရောက်မှာတော့ ဘရိုဇိုဗစ်အနာခံပြီးပေးပို့မှုကို ရော်နယ်ဒိုက ပါးနပ်တဲ့ အဆုံးသတ်မှုနဲ့ သွင်းယူခဲ့ပြီး
အသင်းအတွက် အဖိုးတန်နိုင်ပွဲရယူပေးခဲ့တယ်။
အခုပွဲအနိုင်ရခဲ့လို့ အိမ်ကွင်းမှာကစားရမယ့်
ဒု-ကျော့ပွဲအတွက်ကို အယ်နာဆာအသင်း
ဖိအားလျော့သွားစေခဲ့တာတော့ အမှန်ပါပဲ။
အခုသွင်းဂိုးက ၂၀၂၄ အတွက် ရော်နယ်ဒိုရဲ့
အဖွင့်ဂိုးဆိုလည်းမမှားဘူး။ ဒီသွင်းဂိုးကြောင့်ပဲ
ရော်နယ်ဒိုဟာ ၂၀၀၂ ကနေ ၂၀၂၄ ခုနှစ်အထိ
နှစ်တိုင်းမှာဂိုးသွင်းနိုင်တဲ့ မှတ်တမ်းကိုရခဲ့တယ်။
ပြီးခဲ့တဲ့ ၂၀၂၃ မှာ ပြက္ခဒိန်တနှစ်အတွင်း
ဂိုးသွင်းအများဆုံးကစားသမားဖြစ်ခဲ့တဲ့
ရော်နယ်ဒိုရဲ့ သွင်းဂိုးတွေကတော့ ဆက်ပြီး
ရှိနေဦးမှာသေချာတယ်။ အခုနှစ်မှာရော
ရော်နယ်ဒိုတယောက် မနှစ်ကလိုသွင်းဂိုးတွေ
သွင်းယူနိုင်ဦးမလားဆိုတာကလည်း စိတ်ဝင်စားစရာပဲ။
Comments
Post a Comment