အာရှဖလားမှာ တောင်ကိုရီးယား ဘာကြောင့်ကျရှုံးခဲ့တာလဲ

 

ပြီးခဲ့တဲ့ အာရှဖလားပြိုင်ပွဲမှာ အာရှထိပ်သီးတောင်ကိုရီးယား ဆီမီးဖိုင်နယ်အဆင့်ကနေပဲ ထွက်ခွာခဲ့ရတယ်။ ၁၉၆၀ နောက်ပိုင်း ပထမဆုံးအကြိမ်အဖြစ် အာရှဖလားကို အရယူမယ်လို့ အားခဲထားခဲ့တာတွေ အလကားဖြစ်သွားရတယ်။ တောင်ကိုရီးယားဟာ ကိုယ့်ထက်အဆင့်အများကြီးနိမ့်တဲ့ ဂျော်ဒန်ကို ၂ ဂိုးပြတ်ရှုံးပြီး ပြိုင်ပွဲက ထွက်ခဲ့ရတယ်။

တောင်ကိုရီးယားဟာ ကိုယ့်ထက် ကမ္ဘာ့အဆင့် ၆၄ ဆင့်နိမ့်တဲ့ဂျော်ဒန်ဘက်ကို ဂိုးပေါက်ကန်သွင်းခွင့် ၁ ကြိမ်မှ မလုပ်နိုင်ခဲ့တာ တော်တော်ဆိုးပါတယ်။ တောင်ကိုရီးယားမှာ ထိပ်တန်းကစားသမားတွေ ပါဝင်တယ်။ ဒါပေမဲ့ ကွင်းထဲမှာတော့ ဂျော်ဒန်ကစားသမားတွေရဲ့စည်းလုံးမှု၊ ကြိုးစားမှုနဲ့စိတ်ဓာတ်ကို မယှဉ်နိုင်ခဲ့ဘူး။ အာရှဖလားပြိုင်ပွဲတစ်လျှောက်လုံးမှာ တောင်ကိုရီးယားအတွက် အဆိုးရွားဆုံးစွမ်းဆောင်ရည် ဖြစ်ခဲ့တာပါ။

အာရှဖလားမှာ တောင်ကိုရီးယား ဘာကြောင့်မအောင်မြင်ခဲ့တာလဲ၊ ဂျော်ဒန်ကို ဘာကြောင့်အရေးနိမ့်ခဲ့ရတာလဲဆိုတာကို အသင်းခေါင်းဆောင်ဆွန်ဟောင်မင်ရဲ့လက်ချောင်းက ပလာစတာလေးတွေက အဖြေထုတ်ပေးခဲ့ပါတယ်။ ဆွန်ဟောင်မင်ဟာ ဂျော်ဒန်နဲ့ပွဲတုန်းက လက်ချောင်း ၂ ချောင်းကို ပလာစတာပတ်ပြီး ကစားခဲ့ရတယ်။ အာရှဖလားကပြုတ်ပြီး စပါးကို ပြန်ရောက်တော့လည်း လက်မှာပလာစတာပတ်ရင်းနဲ့ပဲ ကစားခဲ့ပါတယ်။

ဆွန်ဟောင်မင်ဟာ လက်ချောင်းမှာ ပလာစတာကို အလကားပတ်ထားခဲ့တာ မဟုတ်ပါဘူး။ သူ့လက်မှာ ဒဏ်ရာရနေခဲ့တာကြောင့်ပါ။ အဲဒီဒဏ်ရာက ဘယ်လိုရခဲ့သလဲဆိုတော့ ဂျော်ဒန်နဲ့ပွဲမတိုင်ခင်မှာ တောင်ကိုရီးယားအသင်းသားတွေ အတူညစာစားတယ်။ အတူ ညစာစားတယ်ဆိုတာ အသင်းသားတွေရဲ့စည်းလုံးမှုပြယုဂ်ပါ။ အရေးကြီးပွဲကစားရတော့မယ့်အချိန်မှာ အားလုံးစုစုစည်းစည်းနဲ့တိုင်ပင်ကြမယ်။ နိုင်ပွဲရယူဖို့အတွက် စိတ်ဓာတ်အားကို မြှင့်တင်ပြီးသားလည်းဖြစ်မယ်။

အဲဒီမှာ လူငယ်ကစားသမားတစ်သိုက်က ညစာကို အလောသုံးဆယ်စားကြတယ်။ သူတို့ရဲ့အာရုံက ညစာစားပွဲနဲ့ဆီမီးဖိုင်နယ်ပွဲမှာ မရှိဘူး။ စားပွဲတင်တင်းနစ်ပွဲကစားကြဖို့ သူတို့တွေတိုင်ပင်ပြီး ညစာကို လောလောလောလောနဲ့စားကြတာပါ။ ညစာစားပွဲက ထွက်သွားကြတော့ အသင်းခေါင်းဆောင်ဆွန်ဟောင်မင်က တားတာပေါ့။ ဒီအခါမှာ အဲဒီကစားသမားတွေက ဆွန်ဟောင်မင်ကို မလေးမစားပြန်ပြောရင်း အသင်းသားတွေကြား ရုန်းရင်းဆန်ခတ်ဖြစ်ကြတယ်။

ရန်ပွဲမှာ ဆွန်ဟောင်မင် ပါသလား၊ မပါဘူးလားဆိုတာတော့ မသိရဘူး။ သူ့လက်ချောင်းမှာ ဒဏ်ရာရခဲ့တာကတော့ သေချာတယ်။ ဆွန်ဟာ လက်ချောင်းဒဏ်ရာကို ပလာစတာပတ်ပြီး ဂျော်ဒန်နဲ့ပွဲမှာ ဝင်ကစားခဲ့တယ်။ ပွဲမတိုင်ခင်မှာ အသင်းသားတွေရန်ပွဲဖြစ်ပြီး စည်းလုံးမှုပြိုကွဲနေတယ်ဆိုတော့ ကိုယ့်ထက်နိမ့်ကျတဲ့ဂျော်ဒန်ကို ရှုံးခဲ့ရတာ မထူးဆန်းဘူးလို့ ပြောရမယ်။ စည်းလုံးမှုမရှိခြင်းက တောင်ကိုရီးယား ကျရှုံးခဲ့ခြင်းရဲ့အကြောင်းတစ်ရပ်ပါပဲ။