-----------------------------
ဘရာဇီးလို့ ပြောလိုက်တာနဲ့ ဘောလုံးမှော်ဆရာတွေ၊ ဘောလုံးကဝေတွေနဲ့ ပြည့်နှက်နေတဲ့ တိုင်းပြည်တစ်ခုလို့ အားလုံးက သိမြင်ကြပါလိမ့်မယ်။
ဒ့ါအပြင် ဘရာဇီးဟာ ဆရာများသလောက် အောင်မြင်မှုလဲ ကြီးမားတဲ့ တိုင်းပြည်ဖြစ်ပြီး ကမ္ဘာ့ဘောလုံးလောက မှာလဲ ယနေ့တိုင် ဦးဆောင် နိုင်ငံတစ်ခုအဖြစ်နဲ့ ရှိနေပါတယ်။
ဒါပေမယ့် ပြောင်းလဲလာတဲ့ ဘောလုံးရေစီးကြောင်းအရ ဘရာဇီးဟာ နာမည်သာကျန်တော့ပြီး အောင်မြင်မှုတွေ နဲ့ အလှမ်းဝေးလာတာကိုလဲ သတိပြုမိရင် သိနိုင်ပါလိမ့်မယ်။
အရင်ဆုံး ၄နှစ်တစ်ကြိမ် ကျင်းပတဲ့ ကမ္ဘာ့ဖလားပြိုင်ပွဲမှာ အအောင်မြင်ဆုံးအသင်းကို ပြပါဆိုရင် ဘရာဇီးကို ပြရမှာဖြစ်ပြီး စုစုပေါင်း ၅ကြိမ် ချန်ပီယံ ဖြစ်ထားပါတယ်။
ဒါပေမယ့် ဘရာဇီးတို့ နောက်ဆုံး ချန်ပီယံဖြစ်ထားတာက လွန်ခဲ့တဲ့ နှစ်ပေါင်း ၂၀ကျော်ကဖြစ်ပြီး အဲ့ဒီနောက်ပိုင်း ဗိုလ်လုပွဲကိုတောင်ပြန်မတက်နိုင်တော့တာ ယနေ့တိုင်အောင်ပါ။
၂၀၁၄ခုနှစ်တုန်းက အိမ်ရှင်အဖြစ် ကျင်းပခဲ့တဲ့ ကမ္ဘာ့ဖလားပြိုင်ပွဲမှာဆိုရင်လဲ ၂၀၀၂ ကမ္ဘာ့ဖလားဗိုလ်လုပွဲတုန်းက အနိုင်ယူပြီးချန်ပီယံ ဖြစ်ခဲ့တဲ့ ဂျာမနီကို ၇-၁ဂိုးဆိုတဲ့ အရှက်တကွဲ ရလဒ်နဲ့ အရေးနိမ့်ပြီး ပြိုင်ပွဲက စောစီးစွာ ထွက်ပေးခဲ့ရပါသေးတယ်။
ဒါတွေက ဘရာဇီးဆိုရင် ပြိုင်ဖက်တွေ ဖိန့်ဖိန့်တုန်အောင် ကြောက်ခဲ့ရတဲ့နှစ်တွေ တဖြည်းဖြည်း ကုန်ဆုံးလာပြီ ဆိုတာကို သတိပေးနေသလိုပါပဲ။
တောင်အမေရိကဖလားပြိုင်ပွဲမှာလဲ ဘရာဇီးက ချန်ပီယံ ၉ကြိမ်သာ ဖြစ်ထားဖူးပြီး နိုင်ငံအလိုက် အောင်မြင်မှုမှာ တတိယနေရာမှာသာ ရှိနေနိုင်ပါတယ်။
အာဂျင်တီးနားနဲ့ ဥရုဂွေးတို့က ၁၅ကြိမ်စီနဲ့ တောင်အမေရိကဖလားပြိုင်ပွဲမှာ အအောင်မြင်ဆုံးအသင်းတွေအဖြစ် ပူးတွဲ ရပ်တည်နေပါတယ်။
အခုလဲ နွေရာသီ အိုလံပစ် အားကစားပွဲတော်ရဲ့ အမျိုးသားဘောလုံးပြိုင်ပွဲကို ခြေစစ်ပွဲမအောင်လို့ ပါရီသွားခွင့် ဆုံးရှုံးခဲ့ရပါပြီ။
တကယ်တော့ ဘရာဇီးက နွေရာသီ အမျိုးသားအိုလံပစ်ဘောလုံးပြိုင်ပွဲမှာ နှစ်ကြိမ်ဆက် ချန်ပီယံ ဖြစ်ထားပြီး ၂၀၁၆ အိမ်ရှင်လုပ်တုန်းက တစ်ကြိမ်၊ ၂၀၂၀ တိုကျို မှာ တစ်ကြိမ် နှစ်ကြိမ်ဆက် ချန်ပီယံ ဖြစ်ထားတာပါ။
ဒါက လူငယ်မျိုးဆက်တွေ အားကောင်းနေတာကို သိသာစေပေမယ့် အခုတစ်ကြိမ်မှာတော့ ဘရာဇီးလူငယ်တွေ ခြေစွမ်းကျဆင်းလာတာကို ပြသနေပါတယ်။
အိုလံပစ် အတွက် တောင်အမေရိကဇုန် ခြေစစ်ပွဲမှာ အုပ်စု နှစ်စု အရင်ခွဲပြီး ကစားစေပါတယ်။ အုပ်စု(က)မှာ ဘရာဇီးက အုပ်စုဗိုလ်ဖြစ်ခဲ့ပြီး ဗင်နီဇွဲလားက အုပ်စု ဒုတိယ ရခဲ့ပါတယ်။ တစ်ဖက် အုပ်စု(ခ)မှာတော့ အာဂျင်တီးနားနဲ့ ပါရာဂွေးတို့ တက်လှမ်းလာခဲ့ပါတယ်။
အဆိုပါ ၄သင်းကို ပတ်လည် တစ်ကျော့စနစ်နဲ့ ကစားစေပြီး ရမှတ်အများဆုံး ၂သင်းအိုလံပစ်ပြိုင်ပွဲ ဝင်ခွင့်ရစေရာမှာတော့ ဘရာဇီးတို့ ကျန်ရစ်ဖြစ်ခဲ့ရတာပါ။
ဒါက ၂၀၀၄ခုနှစ် နောက်ပိုင်း ပထမဆုံးအကြိမ်ခြေစစ်ပွဲမအောင်မြင်ခဲ့ခြင်းဖြစ်ပြီး ဘရာဇီးမပါတဲ့ အိုလံပစ် အမျိုးသားဘောလုံးပြိုင်ပွဲကို နှစ်ပေါင်း ၂၀ အတွင်း ပထမဆုံး မြင်တွေ့ရတော့မှာပါ။
ဘရာဇီးဆိုတာ လမ်းမတွေပေါ်မှာ ဘောလုံးကစားရင်း ကြီးပြင်းလာတဲ့ လူငယ်တွေရဲ့ ပင်ကိုယ် ပါရမီကို အခြေခံပြီး ဘောလုံးနဲ့ နိုင်ငံကို တည်ဆောက်နေတဲ့ နိုင်ငံအဖြစ် တည်ရှိနေတာက ပြောင်းလဲလာတဲ့ ဘောလုံး ပညာရေးစနစ်အောက်မှာ လုံးပါးမပါးဖို့ဆိုရင် ခေတ်ကို မီအောင် လိုက်ဖို့တော့ လိုအပ်လာပြီလို့ ထင်ပါတယ်။
စနစ်ကျတဲ့ ဘောလုံးပညာရေးကို ဆည်းကပ်ပြီး လမ်းမထက်က ပါရမီရှင်တွေကို လေ့ကျင့်သင်ကြားပေးဖို့ လိုအပ်နေခဲ့ပါပြီ။
ပါရမီတစ်ခုတည်းနဲ့ ခရီးလမ်းအမှန်ကို အမြန်ဆုံး လျှောက်လှမ်းဖို့ဆိုတာက စနစ်ကျတဲ့ ဘောလုံးပညာရေးတွေ မထွန်းကားချိန်မှာ မှန်ကောင်းမှန်နိုင်ပေမယ့် အခုလိုမျိုး ဘောလုံးကို ပညာရပ်တစ်ခုလို သင်ကြားလေ့ကျင့်နေတဲ့ ပြိုင်ဘက်တွေကြားမှာတော့ အနှေးအမြန်ဆုံး ကျဆုံးခန်းတွေက မကြာခဏ ရောက်လာတော့မယ်ဆိုတာ ကတော့ ပေါ်လွင်လာခဲ့ပါပြီ။
Comments
Post a Comment