-------------------------
မန်စီးတီးအသင်းရဲ့ နည်းပြ ဂွါဒီယိုလာကတော့ သူ့ရဲ့ တိုက်စစ်မှူး ဟာလန်းကို ဂိုးတွေ ပိုရဖို့ ပွဲဆက်မပြတ် ထည့်သွင်း ကစားနေတာထက် နားရက်ပိုပေးနိုင်ဖို့ ဆန္ဒပိုရှိကြောင်း ထုတ်ဖော်ပြောလာပါတယ်။
ဟာလန်းကတော့ လက်ရှိမှာ ဒဏ်ရာကြောင့် ၂လကြာ နားနေရရာမှ ပြန်လည်သက်သာလာပြီး နောက်ဆုံး ကစားခဲ့တဲ့ ပရီးမီးယားလိဂ်ပွဲမှာ အသင်းအတွက် အနိုင်ဂိုး ၂ဂိုးစလုံးကိူ သွင်းယူပေးထားနိုင်ပါတယ်။
“သူက ဂိုးသွင်းဖို့ အေးဆေးပဲ ဒါပေမယ့် ဒီကိစ္စက ဂိုးသွင်းတာလောက်နဲ့ မပြီးဘူး။ ကျွန်တော်တို့အနေနဲ့ သူ့ဆီက အသင်းဖော်တွေအတွက် ဘာလုပ်ပေးနိုင်မလဲ ဆိုတာလဲ မျှော်လင့်ပါသေးတယ်။ ဒါပေမယ့် ကျွန်တော်တို့ သူ့ကို ၂လလောက် အနားယူထားရတယ်ဆိုတာကို မေ့ထားပေးလို့မရပါဘူး။ အပြင်းထန်ဆုံး ပေါက်ကွဲအားတွေနဲ့ သူ ချက်ခြင်းကြီး ပြန်လာနိုင်ဖို့တော့ မမျှော်လင့်သင့်ပါဘူး” လို့ ဂွါဒီယိုလာက ကိုပင်ဟေဂင်နဲ့ ချန်ပီယံလိဂ်ပွဲကြို သတင်းစာရှင်းလင်းပွဲမှာ ပြောခဲ့တာပါ။
အဓိကကတော့ ပြီးခဲ့တဲ့ အဲဗာတန်ကို ၂-၀နဲ့ အနိုင်ရခဲ့တဲ့ပွဲမှာ ဟာလန်းအနေနဲ့ ဂိုးမရခင်အထိ ပထမပိုင်းတစ်ပိုင်း လုံး တိတ်ဆိတ်ငြိမ်သက်နေခဲ့တာကို အားလုံးသတိပြုမိကြမှာပါ။
“ဟာလန်းက ငယ်ပါသေးတယ်။ ကျဥ်းမြောင်းလွန်းတဲ့ နေရာမှာ သူက အဓိက ကစားသမားအဖြစ် တိုက်ပွဲဝင်
နေရသူပါ။ ပထမပိုင်းမှာ ကျွန်တော်တို့အနေနဲ့ အကောင်းဆုံး ပံ့ပိုးပေးသူဖြစ်တဲ့ ဒီဘရိုင်း မပါဝင်နိုင်တာကို လက်ခံရမှာပါ။ ဟာလန်းအနေနဲ့ ဘယ်လောက်ထိ ပါဝင်ကစားနိုင်ပြီး ဘယ်လောက်ထိ ဂိုးတွေသွင်းနိုင်အုံးမှာလဲ?”လို့ ဂွါဒီယိုလာက အမေးနဲ့ ပိတ်ခဲ့ပါတယ်။
ဟာလန်းအနေနဲ့ မနှစ်က ချန်ပီယံလိဂ်ပြိုင်ပွဲမှာ ဗိုလ်စွဲစဥ် အသင်းအတွက် ၁၂ဂိုးသွင်းယူခဲ့ပြီး ဂိုးသွင်းအများဆုံး စားသမားဖြစ်ခဲ့ပါတယ်။
ယခုနှစ်မှာလဲ အုပ်စုတွင်းမှာ ၅ဂိုးထိသွင်းယူထားနိုင်ပြီး ဖြစ်သလို ပရီးမီးယားလိဂ်မှာလဲ ၁၆ဂိုးထိသွင်းယူထားပြီး ထိပ်တန်း ဂိုးသွင်းရှင်နေရာကို ဆုပ်ကိုင်ထားဆဲ ဖြစ်ပါတယ်။
မန်စီးတီးကတော့ ယနေ့ညမှာ ဒိန်းမတ်ကလပ် ကိုပင်ဟေဂင်နဲ့ ချန်ပီယံလိဂ် ရှုံးထွက် ၁၆သင်းအဆင့် ပ-ကျော့ကို အဝေးကွင်း သွားရောက်ကစားရဖို့ရှိပြီး ဂွါဒီယိုလာရဲ့ ပြောစကားကြောင့် ဟာလန်း ပွဲထွက် ပါဝင်လာပါ့မလားဆို တာ စိတ်ဝင်စားဖွယ် စောင့်ကြည့်ရပါမယ်။
Comments
Post a Comment