ဘောလုံးပရိသတ်တွေကြားမှာ မက်ဆီဖန်နဲ့ ရော်နယ်ဒိုဖန်ဆိုပြီး အုပ်စု ၂စု ကွဲနေပါတယ်။ များသောအားဖြင့် မက်ဆီ ပရိသတ်တွေက ရော်နယ်ဒိုကို မုန်းကြပြီး ရော်နယ်ဒို ပရိသတ်တွေက မက်ဆီကို မုန်းနေကြမယ်လို့ အများက ယေဘုယျဆန်ဆန် လက်ခံထားကြပါတယ်။
တကယ်တမ်းကျတော့ မက်ဆီဖန်တိုင်းက ရော်နယ်ဒိုကို မမုန်းသလို ရော်နယ်ဒို ပရိသတ်တိုင်းကလဲ မက်ဆီကို မုန်းမနေကြပါဘူး။
အခု ဒီသတင်းကို ဖတ်နေမယ့် ပရိသတ်ကရော သူတို့ နှစ်ဦးထဲက တစ်ဦးဦးကို အခိုင်အမာအားပေးဖြစ်ပြီး ကျန် တစ်ဦးကို မုန်းနေမိလားဆိုတာ ကိုယ့်ကိုယ်ကိုယ် ပြန်စဥ်းစားနေလောက်ပြီလို့ ယူဆပါတယ်။
တကယ်တော့ စာရေးသူကိုယ်တိုင်က ရော်နယ်ဒို ပရိသတ်ပါ။ ဘာလို့ ရော်နယ်ဒို ပရိသတ်ဖြစ်လာသလဲဆိုရင် အင်မတန်မှ မုန်းတီးပြီး၊ အသံကြားရင်တောင် မမြင်ချင် လောက်တဲ့အထိ ထူးချွန်ပြောင်မြောက်ခဲ့တဲ့ ကစားသမားတစ်ဦး ဖြစ်ခဲ့လို့ပါ။
ရော်နယ်ဒို ပရိသတ်လဲဆိုတယ်... မုန်းတယ်လို့လဲ ပြောတော့ နည်းနည်း စာရှုပ်သွားမယ်ဆိုတာ နားလည်ပါတယ်။
ဒီလိုပါ... ကစားသမားကို ဘာလို့ မုန်းလဲဆိုတော့ ကြောက်လို့မုန်းတာပါ။ စာရေးသူ အားပေးတဲ့ အသင်းနဲ့ သူကစားတဲ့ အသင်းတွေ့ပြီဆိုရင် ဒီကစားသမားကို အလိုလိုနေရင်းနဲ့ကို မုန်းပါတယ်။ ဘာလို့ မုန်းလဲဆိုတော့ ကြောက်လို့ မုန်းတာပါ။ ဘာလို့ကြောက်လဲဆိုတာတော့ သေချာရှင်းပြနေဖို့ လိုမယ်မထင်ပါဘူး။
အခုဒီစာကို ရေးဖြစ်တာကလဲ ကိုယ့်ရဲ့ ထင်မြင်ချက် တစ်ခုတည်းနဲ့ ရေးသားခြင်းမဟုတ်ပဲ ကမ္ဘာကျော် ပုဂ္ဂိုလ် တစ်ဦးရဲ့ သုံးသပ်ချက်က ကိုယ့်ရဲ့ ခံစားချက်နဲ့ ကိုက်ညီမှုရှိခဲ့တာကြောင့် ရေးသားဖြစ်ခြင်း ဖြစ်ပါတယ်။
အထက်ဖော်ပြပါ ခေါင်းစဥ်အရ ရော်နယ်ဒိုကို မုန်းတီးတဲ့သူ ကမ္ဘာပေါ်မှာ လူနှစ်မျိုးပဲ ရှိတယ်လို့ ရော်နယ်ဒိုရဲ့ ဆရာ ဖြစ်ခဲ့ဖူးသူ ကမ္ဘာကျော် နည်းပြကြီး မော်ရင်ဟိုက အခိုင်အမာဆိုထားဖူးပါတယ်။
သူပြောချင်တဲ့ လူမျိုး ၂မျိုးထဲက တစ်မျိုးကတော့ သင်အားပေးတဲ့ ကစားသမားထက် ရော်နယ်ဒိုက ပိုကောင်းနေ တာကြောင့်သော်လည်းကောင်း...ဒါမှမဟုတ် သင်အားပေးတဲ့အသင်းကို ရော်နယ်ဒိုက တစ်ချိန်တုန်းက အရှက်တကွဲ ဖြစ်စေခဲ့လို့သော်လည်းကောင်း ဒီအကြောင်းအချင်းအရာ နှစ်ခု မပါဝင် မပတ်သက်ပဲနဲ့တော့ ရော်နယ်ဒိုကို အကြောင်းမဲ့သက်သက် မုန်းစရာမရှိဘူးလို့ အခိုင်အမာ ဆိုခဲ့တာပါ။
ဒီနှစ်ချက်ထဲမှာ စာရေးသူအတွက် တိုက်ရိုက် ဆက်စပ်တာက ဒုတိယအချက်ဖြစ်တဲ့ သင်အားပေးတဲ့အသင်းကို သူက အရှက်တကွဲဖြစ်စေခဲ့လို့ဆိုတဲ့ အချက်ပါ။
ဟုတ်ပါတယ်။ စာရေးသူ ယနေ့တိုင် နှစ်ခြိုက်စွာ အားပေးနေတဲ့ ဘောလုံးအသင်းကို ရော်နယ်ဒိုက ကြိမ်ဖန်များစွာ အနိုင်ယူပြခဲ့လို့ စာရေးသူ ငယ်စဥ်က ရော်နယ်ဒိုဆိုရင် မမြင်ချင်လောက်အောင်ကို မုန်းတီးခဲ့ဖူးတာပါ။
ဒါပေမယ့် တကယ်ထူးချွန်ပြီး စံပြထားလောက်ရမယ့် ပုဂ္ဂိုလ်မျိုး ဆိုတာကို သူ့ရဲ့ လေ့ကျင့်မှု ပြင်းထန်ခြင်း၊ ကြိုးစားမှု မနားမနေခြင်း၊ အောင်ပွဲဆာလောင်မှု မွတ်သိပ်နေခြင်းနဲ့ အနိုင်မခံ အရှုံးမပေး စိတ်ဓာတ်တွေက အတုယူဖွယ်အဖြစ် မြင်လာရတဲ့အခါ ဘယ်လိုမှ ဆက်လက် မမုန်းနိုင်တော့ပဲ သူ့ပရိသတ်ပါ ဖြစ်သွားခဲ့ရပါတော့တယ်။
အခုသတင်းက ရော်နယ်ဒိုအကြောင်း တမင် ချီးကျူးရေးနေတာမျိုး မဟုတ်ပဲ ရော်နယ်ဒိုကို မုန်းတီးခဲ့မိတဲ့ မိမိရဲ့ စိတ်ခံစားချက်နဲ့ မုန်းတီးတဲ့ သူက ဘယ်လိုလူလဲဆိုတာကို မော်ရင်ဟိုက ဟောကိန်းထုတ်မှုနဲ့ တိုက်ဆိုင်သွားလို့သာ သတိတရနဲ့ ပြန်လည်ရေးသားမိခြင်းဖြစ်ပါတယ်။
စာဖတ်ပရိသတ်ကြီးအနေနဲ့ ရော်နယ်ဒိုမှမဟုတ်ပဲ မိမိ မုန်းတီးမိတဲ့ကစားသမားရှိရင်လဲ မော်ရင်ဟို ပြောနေသလိုမျိုး ဖြစ်နေမလားဆိုတာ ပြန်လည် တွေးတောမိစေခဲ့မယ်ဆိုရင် အခုဒီစာကို ဖော်ပြရကျိုးနပ်ပါပြီ။
Comments
Post a Comment