Football Insider ရဲ့ ဖော်ပြချက်အရ အာဆင်နယ်အသင်းရဲ့ အင်္ဂလန်ကြယ်ပွင့် ဘူကာယိုဆာကာရဲ့ ကာလတန်ကြေးဟာ ပေါင် သန်း ၁၅၀ ကနေ ပေါင် သန်း ၂၀၀အထိ မြင့်တက်နေပြီ ဖြစ်ကြောင်း သိရပါတယ်။
ဒါဟာ လက်ရှိ ပရီးမီးယားလိဂ်မှာ ကာလတန်ကြေး အမြင့်ဆုံးလို့ ယူဆနိုင်တဲ့ မန်စီးတီး တိုက်စစ်မှူး ဟာလန်းပြီးရင် ဒုတိယ အများဆုံး ကစားသမားလို့ ဆိုရနိုင်ပါတယ်။
ဆာကာအနေနဲ့ ၂၀၁၇ခုနှစ်က စတင်ပြီး အာဆင်နယ်အသင်းအတွက် ပွဲထွက် ကစားလာခဲ့ရာမှာအခုဆိုရင် ပွဲပေါင်း ၂၁၀ ကျော်လာခဲ့ပါပြီ။
အာဆင်နယ်အသင်းရဲ့ အနီးကပ် ပြိုင်ဖက်တွေ ဖြစ်ကြတဲ့ လီဗာပူးလ်နဲ့ မန်စီးတီးအသင်းတို့ကလဲ သူ့ကို ခေါ်ယူ နိုင်ရေး ကြိုးပမ်းခဲ့ပေမယ့် ၂၀၂၃ခုနှစ်မှာ အာဆင်နယ်နဲ့သာ ၄နှစ်သက်တမ်းတိုး စာချုပ် ချုပ်ဆိုခဲ့သူပါ။
ယခုနှစ် ၂၀၂၃-၂၄ ရာသီမှာတော့ အဆင်နယ်အသင်းအတွက် ပြိုင်ပွဲစုံ ၃၁ပွဲကစားအပြီး ၁၃ဂိုးသွင်းကာ ၁၃ဂိုး ဖန်တီးပေးထားနိုင်ပါပြီ။
မနှစ်က ဘောလုံးရာသီတုန်းကလဲ အသင်းအတွက် ပြိုင်ပွဲစုံ ၄၈ပွဲမှာ ၁၅ဂိုးသွင်းပြီး ၁၁ဂိုးဖန်တီးနိုင်ကာ မန်စီးတီးနဲ့ အပြိုင် အာဆင်နယ်အသင်းကို ဆုဖလား လမ်းကြောင်းပေါ် ဆွဲတင်ပေးခဲ့သူပါ။
ကလပ်အသင်းနည်းတူ နိုင်ငံအသင်းအတွက်လဲ အခုချိန်ထိ ၃၂ပွဲ ပါဝင်ပေးထားကာ ၁၁ဂိုးသွင်းယူပေးထားနိုင်ပါတယ်။
အာဆင်နယ်အသင်းအနေနဲ့ နောက်ဆုံး ဈေးအမြင့်ဆုံးနဲ့ ရောင်းချထားတဲ့ ကစားသမားကတော့ ၂၀၁၇ခုနှစ်က လီဗာပူးလ်ကို ရောင်းချခဲ့တဲ့ ချိန်ဘာလိန်ဖြစ်ပြီး ပေါင် ၃၅သန်းနဲ့ ရောင်းချခဲ့တာပါ။
မျက်မှောက်ခေတ်မှာတော့ ကစားသမားတွေရဲ့ တန်ကြေးတွေမှာ အဆမတန် မြင့်မားနေပြီး အာဆင်နယ် ကစား သမားလေး ဆာကာကတော့ ပေါင် သန်း ၂၀၀ အထိ မြင့်တက်နေတာပါ။
Comments
Post a Comment