ရီးယဲလ်အသင်းရဲ့ အင်္ဂလန်လူငယ်ကြယ်ပွင့်ကစားသမား ဘယ်လင်ဂမ်ဟာ ဒဏ်ရာပြဿနာကြောင့် ၃ ပတ်အထိ အနားယူရဖို့ရှိတယ်လို့ သတင်းထွက်နေပါတယ်။ အသက် ၂၀ သာရှိသေးသူ ဘယ်လင်ဂမ်ဟာ ဂျီရိုနာကို ၄-၀ ဂိုးပြတ်အနိုင်ရတဲ့ လာလီဂါပွဲမှာ ၂ ဂိုးသွင်းခဲ့သလို ဒီရာသီ လာလီဂါမှာ ဘယ်လင်ဂမ်က ၂၁ ပွဲကစား၊ ၁၆ ဂိုးအထိ သွင်းယူထားပြီး ၂၁ ရာစုမှာ လာလီဂါတစ်ရာသီအတွင်း ရီးယဲလ်အသင်းအတွက် ဂိုးအများဆုံးသွင်းယူနိုင်တဲ့ ကွင်းလယ်လူအဖြစ် စံချိန်တင်နိုင်ခဲ့ပါတယ်။ အခုဆိုရင် ဘယ်လင်ဂမ်ဟာ ရီးယဲလ်အသင်းရဲ့ အင်္ဂလန်ဂန္ထဝင်ကစားသမား ဒေးဗစ်ဘက်ခမ် သွင်းယူခဲ့တဲ့ သွင်းဂိုးနဲ့တူညီသွားပြီး နောက်တစ်ဂိုး သွင်းနိုင်မယ်ဆိုရင် ရီးယဲလ်အသင်းသမိုင်းတစ်လျှောက် သွင်းဂိုးအများဆုံး အင်္ဂလန်ကစားသမားအဖြစ် စံချိန်တင်နိုင်မှာဖြစ်ပါတယ်။ ဒေးဗစ်ဘက်ခမ်ဟာ ရီးယဲလ်အသင်းမှာ ၂၀၀၃ ကနေ ၂၀၀၇ အတွင်း ဂိုး ၂၀ သွင်းခဲ့ပြီး အဲဒီအတွက် ပွဲပေါင်း ၁၅၅ ပွဲအထိကစားခဲ့ရပေမဲ့ ဘယ်လင်ဂမ်ကတော့ ၂၉ ပွဲတည်းနဲ့ ဒေးဗစ်ဘက်ခမ်ရဲ့ သွင်းဂိုးအရေအတွက်ကို အမီလိုက်နိုင်ခဲ့ပါတယ်။ ဒါပေမဲ့လည်း ဒုတိယပိုင်းပွဲကစားချိန်အတွင်း ဘယ်လင်ဂမ်ဟာ ဂျီရိုနာကစားသမား ပတ်ဘလိုတိုရေးနဲ့ ထိခိုက်မိခဲ့တာကြောင့် ဆေးကုသမှုခံယူပြီး ပွဲဆက်လက်ကစားဖို့ ကြိုးစားပေမဲ့ အခြေအနေမဟန်လို့ မိနစ်ပိုင်းအကြာမှာပဲ ဘရာဟင်ဒီယက်ဇ်နဲ့ လူစားလဲခံခဲ့ရပါတယ်။
ဘယ်လင်ဂမ်ရဲ့ ဒဏ်ရာကို စမ်းသပ်စစ်ဆေးမှုပြုလုပ်ပြီးတဲ့နောက် ရီးယဲလ်အသင်းက 'အသင်းဆေးအဖွဲ့က ဘယ်လင်ဂမ် ဒဏ်ရာကို စမ်းသပ်မှုတွေပြုလုပ်ခဲ့ပြီး ထွက်ပေါ်လာတဲ့ ဆေးစစ်ချက်အရ ဘယ်လင်ဂမ်ရဲ့ ဘယ်ဘက်ခြေချင်းဝတ်မှာ ထိခိုက်ဒဏ်ရာရရှိခဲ့တယ်လို့ တွေ့ရှိရပါတယ်။ ဘယ်လင်ဂမ်ရဲ့ ဒဏ်ရာ အခြေအနေကောင်းလာအောင် ဂရုစိုက်စောင့်ကြည့်သွားမှာဖြစ်ပါတယ်'လို့ ထုတ်ပြန်ခဲ့ပါတယ်။ ရီးယဲလ်အသင်း ထုတ်ပြန်ချက်ထဲမှာ ဘယ်လင်ဂမ် ဘယ်လောက်အထိ အနားယူရမလဲဆိုတာ မပါဝင်ပေမဲ့လည်း နာမည်ကျော် ဂျာနယ်လစ်ဖြစ်သူ ဖာဘရစ်ဇီယိုရိုမာနိုက ဘယ်လင်ဂမ်ဟာ ၂ ပတ်ကနေ ၃ ပတ်အထိ အနားယူရဖို့ရှိတယ်လို့ ဖော်ပြခဲ့ပါတယ်။ X(Twitter)မှာ ဖာဘရစ်ဇီယိုရိုမာနိုက 'ဘယ်လင်ဂမ်ဟာ ဘယ်ဘက်ခြေချင်းဝတ်မှာ အပြင်းစားထိခိုက်ဒဏ်ရာရရှိခဲ့ပြီး လာမဲ့ပွဲတွေကို လွဲချော်မှာဖြစ်ပါတယ်။ ဘယ်လင်ဂမ်အနေနဲ့ ၂ ပတ်ကနေ ၃ ပတ်လောက် အနားယူရဖို့ရှိသလို လာမဲ့ မတ်လ ၇ ရက်ကျရင် လိုက်ပ်ဇ်နဲ့ကစားမဲ့ ချန်ပီယံလိဂ် ဒုတိယအကျော့ပွဲမှ ပြန်ကစားနိုင်ဖို့ရှိပါတယ်။ လာမဲ့ ပထမအကျော့ပွဲကိုတော့ ဘယ်လင်ဂမ်၊ ရူဒီဂါတို့ သေချာပေါက် လွဲချော်မှာပါ'လို့ Post တင်ခဲ့ပါတယ်။ ရီးယဲလ်အသင်းဟာ မနက်ဖြန်မှာ ချန်ပီယံလိဂ် ရှုံးထွက် ၁၆ သင်းအဆင့်၊ ပထမအကျော့အဖြစ် လိုက်ပ်ဇစ်နဲ့အဝေးကွင်းပွဲကစားရမှာဖြစ်ပြီး ဘယ်လင်ဂမ်ဟာ အဲဒီပွဲအပါအဝင် ဗယ်လက်ကာနို၊ ဆီဗီလာ၊ ဗလင်စီယာတို့နဲ့ကစားမဲ့ လာလီဂါပွဲတွေကိုလည်း လွဲချော်ဖို့ရှိတာကြောင့် ရီးယဲလ်အသင်းအတွက် ကြီးမားတဲ့ထိုးနှက်ချက်ဖြစ်လာပါပြီ။
Comments
Post a Comment