ရှုံးပွဲမရှိမှတ်တမ်း ဆက်ထိန်းပြီး ဘိုင်ယန်ကို ၅ မှတ်ဖြတ်နိုင်ပြီဖြစ်တဲ့ အလွန်ဆိုရဲ့လေဗာကူဆင် . .

 

ဘွန်ဒစ်လီဂါ အမှတ်ပေးဇယား အဆင့် ၁၊ ၂ အသင်းတွေဖြစ်ကြတဲ့ လေဗာကူဆင်နဲ့ဘိုင်ယန်မြူးနစ်တို့ပွဲမှာ လေဗာကူဆင်က အိမ်ကွင်းမှာ ခြေစွမ်းပြပြီးတော့ ၃-၀ ဂိုးပြတ်အနိုင်ရခဲ့ပါတယ်။ ခံစစ်၊ တိုက်စစ်ကို ဟန်ချက်ညီညီ တည်ဆောက်ထားတဲ့ လေဗာကူဆင်အသင်းဟာ အခုပွဲမှာ ခံစစ်ပိုင်းက ဘိုင်ယန်မြူးနစ်ကို ကောင်းကောင်း ထိန်းချုပ်နိုင်သလို တိုက်စစ်ပိုင်းကလည်း လိုအပ်တဲ့ဂိုးတွေ သွင်းယူနိုင်ခဲ့ပါတယ်။ အခုပွဲ၊ ပထမပိုင်းအပြီးမှာ ဘိုင်ယန်မြူးနစ်အသင်းဟာ ဂိုးပေါက်ကန်ချက် ၃ ကြိမ်သာရှိခဲ့ပြီး ဒါက ဒီရာသီ ဘွန်ဒစ်လီဂါပွဲစဉ်တစ်ပွဲရဲ့ ပထမပိုင်းအတွင်း ဘိုင်ယန်မြူးနစ်အသင်းအတွက် ဂိုးပေါက်ကန်ချက်အနည်းဆုံးပြုလုပ်နိုင်ခဲ့တာပါပဲ။ ဒ့ါအပြင် တစ်ပွဲလုံးမှာ ဘိုင်ယန်မြူးနစ်တို့ ဂိုးပေါက်တည့်မှု ၁ ကြိမ်သာရှိတာကြောင့် ၂၀၂၂ ဧပြီလနောက်ပိုင်း အဆိုးရွားဆုံးစွမ်းဆောင်မှတ်တမ်းဖြစ်ပါတယ်။ ဒီရာသီမှာ ဂိုးတွေ တဒိုင်းဒိုင်းသွင်းပြနေတဲ့ အင်္ဂလန်နာမည်ကျော်တိုက်စစ်မှူး ဟယ်ရီကိန်းကလည်း တကယ့်အရေးအကြောင်းဆို ခြေစွမ်းမပြနိုင်ဘဲ အခုပွဲမှာလည်း တစ်ပွဲလုံး ဘောလုံးထိချက် ၁၈ ကြိမ်သာရှိသလို ဂိုးပေါက်တည့်မှုမရှိ၊ အခွင့်အရေးဖန်တီးနိုင်မှု တစ်ကြိမ်မှ မရှိခဲ့ပါဘူး။ လေဗာကူဆင်အတွက် အဖွင့်ဂိုးကို ၁၈ မိနစ်မှာ နောက်ခံလူ စတန်နီချစ်က သွင်းယူခဲ့ပြီး ဒီရာသီအစကမှ ဘိုင်ယန်မြူးနစ်ကနေ လေဗာကူဆင်ကို တစ်ရာသီအငှားနဲ့ပြောင်းရွှေ့ခဲ့သူ စတန်နီချစ်ဟာ မိခင်ကလပ်ကို ဂိုးသွင်းပြီးတဲ့နောက် အောင်ပွဲမခံခဲ့ပါဘူး။

ဒုတိယဂိုးကို မိနစ် ၅၀ မှာ ဂရီမယ်လ်ဒိုနဲ့ တယ်လာတို့ One Two ရိုက်ပြီးတော့ တယ်လာ ထိုးပေးတာကနေ ဂရီမဲလ်ဒိုက ပိတ်သွင်းခဲ့တာဖြစ်ပါတယ်။ ဒီရာသီအစက ဘင်ဖီကာအသင်းကနေ အလွတ်နဲ့ပြောင်းရွှေ့ခဲ့တဲ့ အသက် ၂၈ နှစ်အရွယ်ရှိပြီဖြစ်သူ ဂရီမယ်လ်ဒိုဟာ လေဗာကူဆင်အတွက် မယုံနိုင်လောက်အောင် ခြေစွမ်းပြနေပြီး ဒီရာသီ ဘွန်ဒစ်လီဂါမှာ ၂၁ ပွဲကစား၊ သွင်းဂိုးပါဝင်ပတ်သက်မှု ၁၇ ဂိုး(၈ ဂိုးသွင်း၊ ဂိုးဖန်တီးမှု ၉)ကြိမ်အထိရှိလာပြီဖြစ်လို့ ကစားသမားဟောင်း ပက်ထရစ်ဟဲလ်မက်စ် (၁၉ ဂိုး၊ ၂၀၀၈-၀၉)နောက်ပိုင်း ဘွန်ဒစ်လီဂါပွဲဦးထွက်ရာသီမှာ ၂၁ ပွဲကစားအပြီးမှာပဲ သွင်းဂိုးပါဝင်ပတ်သက်မှု အများဆုံး လေဗာကူဆင်ကစားသမားအဖြစ် မှတ်တမ်းဝင်ခဲ့ပါတယ်။ တတိယဂိုးကိုတော့ ပွဲပြီးခါနီးမှာ တန်ပြန်တိုက်စစ်ကနေ ဖရင်းပေါင်က ဂိုးသမားမရှိတဲ့ ဂိုးပေါက်ထဲကို လွတ်လွတ်ကျွတ်ကျွတ်ကန်သွင်းခဲ့တာဖြစ်ပါတယ်။ အခုနိုင်ပွဲကြောင့် လေဗာကူဆင်အသင်းဟာ ဘိုင်ယန်မြူးနစ်ကို ၅ မှတ် ပြန်ဖြတ်နိုင်ပြီး အသင်းသမိုင်းတစ်လျှောက် ပထမဆုံးဘွန်ဒစ်လီဂါချန်ပီယံဖလား ကိုင်မြှောက်ခွင့်ရဖို့ နီးစပ်နေပါပြီ။ နည်းပြအလွန်ဆိုလက်ထက်မှာ လေဗာကူဆင်အသင်းဟာ ပြိုင်ပွဲစုံ နောက်ဆုံး ၃၁ ပွဲဆက်တိုက်ရှုံးပွဲမရှိဘဲ ၂၇ ပွဲနိုင်၊ ၄ ပွဲသရေ၊ ရဂိုး ၉၃ ဂိုး၊ ပေးဂိုး ၂၂ ဂိုး၊ Clean Sheets ၁၅ ပွဲအထိ ရယူနိုင်ခဲ့ပါတယ်။ တကယ်လို့ နောက်တစ်ပတ်ကစားမဲ့ ဟော်ဖန်ဟင်မ်နဲ့ဘွန်ဒစ်လီဂါအဝေးကွင်းပွဲမှာ လေဗာကူဆင်တို့ ရှုံးပွဲမရှိအောင်ကစားနိုင်ရင် ဘိုင်ယန်မြူးနစ်အသင်း တင်ရှိထားတဲ့ ပြိုင်ပွဲစုံပွဲဆက်အများဆုံး ရှုံးပွဲမရှိစံချိန်ကို အမီလိုက်နိုင်မှာဖြစ်ပါတယ်။ ဘိုင်ယန်မြူးနစ်အသင်းဟာ နာမည်ကျော်နည်းပြဟောင်း ဟန်စီဖလစ်ခ်လက်ထက်တုန်းက ၂၀၁၉ ကနေ ၂၀၂၀ အတွင်း ပြိုင်ပွဲစုံ ၃၂ ပွဲဆက်တိုက်ရှုံးပွဲမရှိဘဲ ဂျာမန်ဘောလုံးလောကမှာ ရှုံးပွဲမရှိပွဲဆက်အများဆုံးအဖြစ် စံချိန်တင်ခဲ့ပါတယ်။