မပိုင်တော့ပေမယ့် ဆိုင်ခဲ့ဖူးတဲ့ ရင်ခွင်ထဲမှာ ဂုဏ်ယူမှုတွေ အပြည့်နဲ့ပါ ခရစ္စတီယာနို ရိုနယ်လ်ဒိုလ်

 

ရီရဲမက်ဒရစ်က ပိုကောင်းတဲ့ ရော်နဒိုကို ပိုင်ဆိုင်ခဲ့တယ်ဆိုတာ ငြင်းစရာတော့ မဟုတ်ဘူးဗျ။ရော်နဒိုရဲ့ သွင်းဂိုးအများစုကလည်း ဆယ်စုနှစ် တစ်စုလောက် ကစားခဲ့တဲ့ ရီရဲမက်ဒရစ်မှာ သွင်းယူနိုင်ခဲ့တာလေ။ဘောလွန်ဒေါ 4ကြိမ်နဲ့ ချန်ပီယံလိဂ်ဖလားလေးကြိမ်အထိ ရရှိခဲ့တဲ့ မက်ဒရစ်မြေဟာ ရော်နဒိုအတွက်တော့ အခြားနေရာတွေ အားလုံးထက်ကြီးကျယ် ခမ်းနားနေမယ်ဆိုတာ ပြောစရာမလိုပါဘူး။ရော်နဒိုရဲ့ အရိပ်အခြေကို အကဲဖြတ်ကြည့်ရသလောက် သူကစားဖူးတဲ့ အသင်းတွေထဲမှာ

ရီရဲမက်ဒရစ်ကိုအချစ်ဆုံးဆိုတာသေချာသလောက်ပဲ။

ရော်နဒိုရဲ့အချစ်ဆုံးအသင်း၊ အကောင်းဆုံးကစားသမားရဲ့ အကောင်းဆုံးချိန်တွေကို ပိုင်ဆိုင်နိုင်ခဲ့တဲ့

ရီရဲမက်ဒရစ် ပရိတ်သတ်တွေ ဘယ်လောက်ထိကံကောင်းခဲ့သလည်း။ဒီလိုခံစားချက်မျိုးဆိုတာ

modern ခေတ်ဘောလုံးလောကမှာ ဘာစီနာပရိတ်သတ်တွေနဲ့ ရီရဲမက်ဒရစ် ပရိတ်သတ်တွေကလွဲပြီး ခံစားဖူးကြမယ်မထင်ဘူး။ပေါ်တူဂီနဲ့အာဂျင်တီးနား ပရိတ်သတ်တွေတော့ ရှိမှာပေါ့လေ။ထားပါ။အကောင်းဆုံးကစားသမားရဲ့ အချစ်ဆုံးဖြစ်ရတဲ့ ခံစားချက်၊အကောင်းဆုံး ကစားသမားရဲ့ အကောင်းဆုံးချိန်ကို ပိုင်ဆိုင်ခွင့်ရတဲ့

ခံစားချက်ထက် ပိုပြီးအရသာရှိလှတဲ့ ခံစားချက်ကို

ရင်ဝယ်ပိုက်ဖူးတဲ့ အသင်းတစ်သင်းရှိတယ် ဆိုရင်‌ရောခင်ဗျားတို့ ယုံကြမလား။ရော်နဒိုနဲ့တူတဲ့ ရော်နဒိုကို

ခင်ဗျားတို့ ခံစားကြည့်ဖူးတယ် မဟုတ်လား။

ဂိုးသွင်းကောင်းတဲ့ရော်နဒိုမဟုတ်ဘူး၊ ဒိတ်ဒိတ်ကျဲ

ရော်နဒိုမဟုတ်ဘူး။ဆံပင်ခပ်ဖွဖွနဲ့ ချာတိတ်လေး

တစ်ယောက်၊ ညို့မှိုင်းတဲ့ ရာသီဥတုတွေအောက်မှာ

ဆွဲဆောင်မှုပြည့်ဝတဲ့၊ အရိုင်းဆန်ဆန်‌ ဘောလုံးစကေးတွေနဲ့ ဖျော်ဖြေဟန်တွေကို မန်‌ချက်စတာ အနီရောင်နယ်မြေမှလွဲပြီး အခြားမှာ မတွေ့ခဲ့ရဖူးဘူး။‌ဆွဲဆောင်သားပြည့်ဝတဲ့ ထိချက်တွေ၊ပြိုင်ဖက် ကစားသမားတွေကို ဒေါသအလှိုင်လှိုင်ထွက်စေမဲ့ လှည့်ကွက်တွေ၊တောင်ပံတစ်ကြောကနေ ဖြတ်ပြေးလာပြီး အတွင်းကိုချိုးဝင် ကန်သွင်းတော့မယ့် ဟန်ပန်အမူရာတွေ၊ ဘယ်လောက်ထိရင်သပ်ရှုမောစရာကောင်းလိုက်လည်း။သွင်းဂိုးတွေက ဘောလုံးကမ္ဘာရဲ့ ဦးတည်ချက်ပန်းတိုင်ဆိုရင် မန်ချက်စတာကစားသမားဘဝက ရော်နဒိုရဲ့

လှည့်ကွက်တွေနဲ့ အရိုင်းဆန်ဆန်ကျော်ဖြတ်ပုံတွေက

ဘောလုံးကမ္ဘာနဲ့ ပရိတ်သတ်တွေကြားက ငြီးငွေ့မှုကင်းတဲ့ ဆွဲဆောင်မှု ဖြစ်ခဲ့တယ်။ထိုအခါက ရော်နဒိုဂိုးသွင်းနိုင်မှ အောင်ပွဲခံခဲ့ကြခြင်းမဟုတ်၊ရော်နဒို လှည့်စားပြလိုက်တဲ့အခိုက်အတန့်‌၊ ရော်နဒိုလုပ်ပြလိုက်တဲ့

အကွက်ဆန်းတွေက ယူနိုက်တက် ပရိတ်သတ်တိုင်းအတွက် အောင်ပွဲခံစရာ အခိုက်အတန့်တွေဖြစ်ခဲ့တယ်။

ထိုအချိန်ကရော်နဒိုက ပိုပြီးလတ်ဆတ်တယ်၊ပိုပြီးအကြောတင်းတယ်၊ရင့်ကျက်မှုတော့မရှိသေးဘူး၊

ပိုပြီးဖျော်ဖြေမှုပေးနိုင်ခဲ့တယ်၊သွင်းဂိုးတွေနဲ့ ရော်နဒိုကိုတွဲမြင်ကြတာမဟုတ်ပဲ ဘောလုံးကို မြင်ရုံနဲ့ ရော်နဒိုဖြစ်ချင်လာကြတဲ့ ချာတိတ်တွေ ဒုနဲ့ဒေး။အားကစားပစ္စည်းဆိုင်က ဂျာစီဝယ်လာလို့ No မပါ၊နာမည်မပါရင်တောင်မြေဖြူခဲတို့၊ဆော့ပန်တို့နဲ့ No7 လို့ ကင်ပွန်းတပ်ကြတဲ့အထိ ရူးသွပ်ခဲ့ကြတယ်။ရူးသွပ်ချင်စရာ ကောင်းတာကိုး။

ရော်နဒို အမာခံတွေစိတ်ဆိုးနိုင်လောက်မယ့်စကားတစ်ခွန်းပြောရရင် ထိုအချိန်က ရော်နဒိုက လူသားတစ်‌ ယောက်နဲ့ပိုတူတယ်၊အကြောတင်းပေမဲ့ လူငယ်ဆန်ဆန်တင်းတာ။ခံစားချက်တွေကို မြိုသိပ်မထားတက်ဘူး။

သာမန်ကစားသမားတွေလိုပဲ ခံစားချက်တွေနဲ့ တည်ဆောက်ထားတာ။အချိန်မရွေး မျက်ရည်မိုးတွေ သွန်ချ ပစ်တက်တယ်။‌ရီရဲမက်ဒရစ်က ရော်နဒိုလို mental strong မဖြစ်ဘူး။အဆုံးသတ်မှာတော့ ပိုပြီး ချစ်ဖို့၊နှစ်သက်ဖို့ ကောင်းတဲ့ ရော်နဒိုက ယူနိုက်တက်မှာ

ရှိခဲ့တာ။ကမ္ဘာအရပ်ရပ်က ရော်နဒိုပရိတ်သတ်တွေ သတိမပြုမိခင်အချိန်ကတည်းက ယူနိုက်ပရိတ်သတ်တွေရင်ထဲမှာ ရော်နဒိုက ကြီးမြတ်ခဲ့ပြီးပြီ။ရော်နဒိုကို

ယူနိုက်တက်ပရိတ်သတ်တွေ ဘယ်လောက်ချစ်ခဲ့လည်းမေးရင် အကောင်းဆုံးအချိန်မှာ ရီရဲမက်ဒရစ်ကိုပြောင်းသွားတဲ့ အချိန်အထိ စိတ်မနာနိုင်တာပဲ ကြည့်ဗျာ။ရော်နဒိုဖက်ကကြည့်ရင်လည်း သူ့ဘဝအတွက် မှန်ကန်တဲ့ အရွေ့တစ်ခုကို ဆုံးဖြတ်နိုင်ခဲ့တယ်။ပြတ်သားနိုင်ခဲ့တယ်။

ရော်နဒိုရဲ့ကစားသမားဘဝက အခုလောက်ထိခမ်းနားခဲ့‌တာ သံယောဇဉ်တွေကို ဖြတ်တောက်နိုင်ခဲ့လို့လည်းပါတယ်။တွယ်ငြိရာသာ ဆုံးရှုံးရာလို့ဆိုသလိုပဲ ရော်နဒိုသာ ယူနိုက်တက်မှာ ဆက်နေခဲ့ရင် အခုလောက်အထိ ခမ်းနားနေမလား မသေချာဘူး။ဘာပဲဖြစ်ဖြစ်ပါ။ကျွန်တော်တို့အသင်းမှာ ရော်နဒိုရှိနေပါသေးတယ်။ရော်နဒိုနဲ့တူတဲ့

ရော်နဒိုကို ရီရဲမက်ဒရစ်မှာ မတွေ့ရတော့သလို ဂျူဗင်

မှာလည်းမတွေ့ရတော့ဘူး။အတောက်ပဆုံးရောနဒိုကို

ဆုံးရှုံးခဲ့ရတဲ့ အနီရောင်တွေအတွက်၊ဆွဲဆောင်မှုအရှိဆုံးကစားဟန်နဲ့ တောင်ပံကစားသမား ဆန်ဆန် ပုံရိပ်တွေက

ကောင်းကောင်းကြီး နှစ်သိမ့်ပေးနိုင်ခဲ့မှာပါ။

ရော်နဒို ယူနိုက်တက်ကို တကယ်ချစ်ခဲ့လား ကျွန်တော်တို့မသိဘူး၊ ရော်နဒိုအချစ်ဆုံးက ရီရဲမက်ဒရစ်လား ဂရုမစိုက်ဘူး။ရော်နဒိုနဲ့တူတဲ့ ရော်နဒိုကို အတိတ်ပုံရိပ်အဖြစ်

တသီးတသန့် ဖြစ်တည်ပေးခဲ့တာနဲ့တင် ကျေနပ်ကြရမှာပါ။